جرب تسأل مجموعة من الناس بعد خمس او عشر سنين مثلا ، انت عملت ايه من وظيفتك ووفرت منها كام؟ الإجابة هتصدمك! ولا حاجة! طيب انت من وجهة نظرك شايف ليه هو موصلش لحاجة من شغله؟
اولا لانه كان بيدخل في قروض عشان الاقساط كتير زي شراء عربيه او قسط منزل او زواج، بمعنى تاني انه كان بيضغط نفسه من ناحيه الفلوس، يعني اشتغل كل الفترة دي عشان يطلع بديون تضغطه و تعيشه في هم وتعاسه ومطلعش برأس مال يستثمره في بيزنس وفني حياته علي الفاضى!
الدراسات الاجتماعية والاقتصادية ثبتت ان عدد كبير اوي من دول العالم فيهم اشخاص عصاميين و عندهم ارادة قوية وسعي و بدأو و حققو ثروتهم من الصفر! عارف ليه؟ لان هما بيتميزو “بميزة اساسية” و هي ان الادخار عندهم حاجة اساسية ومستمرة مهما كانت الظروف.
إقرأ المزيد: التسويق بالأسرار – أرجوك متقولش لحد
وادخار المال حاجة سهلة بس تنفيذها صعب عند معظم الناس، و فيه ناس كتير عارفه و متأكده ان نتايجها عظيمة و كبيرة، بس الواقع و ظروفهم بتقول ان هما بيلاقو صعوبة انهم يدخرو سواء دلوقتي او بعدين.
لا تقل لي ما هي اولوياتك. أرني أين أنفقت مالك وسأقول لك ما هي تلك الأولويات.
جيمس فريك
مش محتاجين نتكلم كتير في تفاصيل فوايد الادخار اللي ملهاش اخر، بس مهم اوي نعرفك علي 4 نقاط هتساعدك تدخر فلوسك و تقتنع بالادخار انه يكون حاجة اساسية في حياتك و بند من بنود ميزانيتك الشهرية.
1. الادخار بيخليك تحس بالاستقلالية
مفيش حد هيحس بالاستقلال والاستقرار المالي غير لو معاه فلوس كتير تكفيه علي الاقل ست شهور ، و ده في حالة لو استغنو عنه في العمل او هو ساب الشغل عشان يشوف غيره.
لان مش من المنطقي انك تكون شغال في وظيفة بتحتاج منك جهد وتعب كبير ووقت والتزام بيها، وفي الاخر تاخد منها مرتب يدوب يكفي احتياجاتك الثابتة كل شهر!
هنا لازم تدور علي وظيفة احسن، و لازم تعمل احتياط في حالة لو فقدت شغلك او مبقتش قادر تشتغل وصحتك مش سامحه، او يحصلك ظرف مفاجئ و تكون محتاج تدفع فيه مبلغ كبير، طبعا المواقف دي كلها لو انت مدخر فلوس كفاية معاك و دايما كنت مهتم بالادخار بصفة مستمرة ساعتها هتحس بالاستقلال المادي والحرية وانك مش محتاج تدخل في ديون و مشاكل و بعدت نفسك عن الطريق ده، و كل ما كنت مدخر فلوس كتير هتحسسك دايما بالاستقرار النفسى.
2. الادخار بيمنع خوفك ناحية المستقبل
لو انت مكنتش مستقر ماديا ودايما بتعيش في ضغوطات مالية ومش بتدخر اي فلوس، ده سبب كبير انه يخليك تحس دايما بخوف وقلق مستمر ناحية المستقبل، لان انت مش ضامن اي ظروف تظهرلك وطوارئ مفاجئه و انت مش قدها، فده هيخليك تعيش حزين و هيبعدك عن طريق نجاحك ومش هتبقي عارف تفكر تعمل ايه و توصل لاهدافك ازاي و مش عارف حياتك رايحه فين!
لكن لو انت بتعرف تدخر و بتعمل ده بشكل مستمر، هيقل خوفك و قلقك من المستقبل و هتبقي عايش مرتاح البال،
لان فلوسك اللي انت بتدخرها بتزيد يوم بعد يوم و كل ما كانت بتزيد كل ما كنت هتحس براحه كبيره ومطمئن علي مستقبلك اكتر ومش هتخاف من تغيرات الحياه زي الغلاء اللي حصل في مجتمعنا فجأه او ان يظهرلك اي طوارىء مفاجئه لاقدر الله.
3. الادخار هيحققلك احلامك
كلنا لينا اهداف واحلام متشابهة نفسنا تتحقق زي امتلاك شقه – زواج – سفر – استثمار و غيرها كتير من الحاجات اللي عايزينها تتحقق، و كلها اهداف واحلام كبيرة محتاجه فلوس كتير، وعشان تحققها هنا طبعا هيكون قدامك اختيارين ، يا اما تاخد قروض بنكية او تبدأ تحط خطة ادخار مالية و تلتزم بيها، عشان تعرف توفر الفلوس اللي هتحقق بيها احلامك من غير ما تفكر في الاقتراض واللي دايما بيكون مكلف وعليه فوايد كتير وهتدخل في مشاكل اكتر لو معرفتش تسدد المبلغ، عشان كدا الادخار حاجة مهمه جدا وهتخليك مرتاح و هتساعدك في تحقيق احلامك وخلي بالك الادخار هي الخطوة اللي قبل الاستثمار.
4. الادخار مهم وبيعلمك قيمة الاشياء
فيه ناس كتير عندها صفة التبذير والاسراف بطريقة صعبة، وللأسف النوعية دي مبتعرفش قيمه الحاجات اللي في حياتها كويس، و الادخار هنا اساسى ليهم عشان تتعلم قيمم الحاجات الموجودة في حياتهم، وايه اللي المفروض نشتريه واساسى و ايه اللي ممكن نتنازل عنه دلوقتي من ناحية الأولويات؟
مهم: افضل طريقة تعرف بيها مشروعك التاني
الادخار هيديهم فرص اكتر انهم يبصو للحاجة بنظرة معنوية مش نظرة مادية ويحسو بقيمة المستقبل، وانهم لازم يأمنو حياتهم الجايه، ومش يعيشوا في فوضي، لانهم هيحسو فعلا بقيمة كل ده في المستقبل لو ماخدوش خطوة الادخار من دلوقتي.
