مايكل دانلوب نشر مقالة كتب فيها كل اللى اتعلمه لحد دلوقتى في الحياة والتجارة ومشاريع الانترنت، ورغم ان سنه صغير (21 سنة) نجح انه يأمن لنفسه أكتر من مصدر للدخل، فمبقاش محتاج وظيفة بالنهار زينا، وقبل ما تفكر ان مايكل عنده حاجه تتعلمها منه، بفكرك أن مدرسة الحياة والتجارب هي أكبر مصدر للعلوم، مش الكتب أو دور العلم بس.
فانا طلبت من مايكل أنه يأذن لي اترجم مقالته دى، وهو وافق انى اترجم اللى انا عايزه بشرط انى احط رابط لكل موضوع، وبعد التوضيح ده يلا نبدأ، مايكل بيقول:
1- مفيش حاجة اكيدة في الحياة أو التجارة
مش معنى أنك نجحت في حاجة النهاردة، أنك هتنجح بكرة لو كررت اللى عملته، الحقيقة دى اتعلمها كل اللى شغالين في التسويق والمبيعات والإعلان، فمفيش ضمانات عشان كده لازم تستمر في المحاولة.
2- بلاش تحط البيض كله في سلة واحدة
بمعنى متخليش مصدر دخلك الوحيد هو بيع الإعلانات من موقعك على سبيل المثال، لكن لازم تبحث دايما عن مصادر تانية زى بيع سلع أو خدمات، أو تأليف كتب أو تدى دورات أو تعمل مواقع تانية بتتكلم عن مواضيع مختلفة.
ركز على عدد قليل من المواقع المختلفة وركز على طرق تزود بيها الدخل.
Michael Dunlop
3- العملاء غلطانين!
ممكن يكون العملاء غلطانين فعلا، لكن لو قولتلهم كده مش هتاخد نتيجة إيجابية.
التجارة الناجحة بتقوم على أسس التواصل الناجح وفنون الإقناع.
إقرأ المزيد: التسويق بالأسرار – أرجوك متقولش لحد
4- حدد محتوى موقعك بكذا شكل
بعد ما كتبت مواضيعك لازم تحولها لمسموعة أو مرئية، أو الاثنين مع بعض، أو تعملها في صورة ملفات PDF ممكن اى حد يقراها على اكتر من منصة وجهاز.
5- متستعجلش
مايكل حاول يوصل لمرحلة انه يكتب تدوينة جديدة كل يوم، لكنه مقدرش يعمل كده، لأن الحاجة الكويسة مش ممكن تستعجل فيها او تاخدها بسرعة.
لما تكتب مقالة تستحق القراءة من الزوار، فأنت بيجيلك مردود أكبر من مجرد انك تنزل مقالة كل يوم عشان تدى انطباع بانك تجدد موقعك ومدونتك.
6- الشغل لمدة 4 ساعات مش لكل الناس
فكرة الشغل لمدة 4 ساعات في الأسبوع مجابتش نتيجة مع مايكل، علي بالرغم من أن مؤلف الكتاب ده نجح انه يختار عنوان خلى الناس يشتروه ويقرؤوه، لكن التطبيق العملي بيوضح أن الفكرة دى محتاجة لنوعية محددة من الناس ومن الأعمال، وده مش متوفر عند كل الناس.
7- البركة في البكور
الطير المبكر بيلاقى أكله وعندك مثال موقع تويتر، فأوائل المسوقين اللى عرفوا قدرات الموقع ده واستغلوه في التسويق لنفسهم لسه بيحققوا نتايج أفضل من غيرهم اللى وصلوا القطر متأخرين، فلما تيجى الفرصة قدامك، استغلها.
8- هتقابل في طريقك ناس بيستغلوك
فى السنين اللى فاتت مايكل اتعرض للسرقه واتشهر به، وهو رد عليهم كتير، لكن هو شايف أن استغلال الوقت المتاح
في انك تكسب الفلوس هو أفضل استخدام للوقت.
وفى نوعية من البشر عقلهم صغير في العالم ده مبيقدروش يفكروا فى انهم يكسبوا بالحلال ودول هينتهوا بنهاية حزينة تليق بيهم.
9- المحتوى هو الملك
هيقولولك لازم تسوق لموقعك، لكن في اوقات كتير الزوار هيلاقوك بسبب جودة اللى بتكتبه وبتقدمه، بفضل التسويق بالمدح وكلمات الشكر، ومصادر تانية غير مباشرة.
10- الالتزام والمداومة باهتمام شديد
لو قللت معدلك اللى متعود عليه في الكتابة وحدثت موقعك، هتلاقى الناس بتمشى وبينسوك. ايوة، حتى مايكل شايف ان الالتزام بالمبدأ ده صعب في الواقع العملي.
مهم: افضل طريقة تعرف بيها مشروعك التاني
11- خليك واقعي وماتبلغش
إذا كنت صاحب بيزنس فمتتوقعش ان اللى شغالين معاك يكونوا بنفس حماسك وطريقة تفكيرك، فممكن يوصل بيهم الموضوع انهم يحاربوك في السر عشان يقللوا شغلهم. ماتتوقعش عكس كده وعالج الموضوع بانك تقدم علاوات تحفزهم وتكون مرتبطة بالنتايج والأرباح.
