صاحب البيزنس او رائد الاعمال بيحب يتعلم دايما كل يوم حاجة جديدة تساعده في إدارة شركته واتخاذ القرارت بأفضل شكل ممكن، في المقال ده نتكلم علي اهم 10 نصائح لبرت ويلسون لإدارة الشركات الناشئة والصغيرة، واوعي تتجاهل النصائح دي بأي شكل ممكن.
متخفش من التفكير خارج حدود التقليدي، مش معني ان الحاجة اللي انت شغال عليها بتشتغل بكفاءة ان من الصعب تحسنها اكتر.
W. Brett Wilson
1-خليك ورا اللى بتحبه حتى لو حذروك منه
اتخرجت من الجامعة بعد ما درست هندسة مدنية، واشتغلت مهندس فى واحدة من أكبر شركات البترول في العالم لمدة 3 سنين، بس مكنتش سعيد فى السنين دى واكتشفت ان الهندسة مش المجال اللى هكون مبسوط وانا شغال فيه.
كنت حابب مجال الأعمال والتجارة، أول حد اشتغلت معاه قالى نصيحة انى مش هفلح أبدا في مجال الإدارة، لكن رغم النصيحة دى درست ماجستير إدارة اعمال MBA وكنت أول خريج في مادة العصامية – انتربرنورشيب.
بعد ماخلصت دراسة اشتغلت على طول فى بنك في وظيفة مستثمر، ومندمتش خالص على القرار ده، ومن ساعتها حققت نجاحات كتير واستثمرت في شركات ناجحة لحد ما بدأت شركتي الاستشارية الخاصة بيا.
اللى يضحك ان لما بدأت شركتي الخاصة، اتصل بيا والدي وعرض عليا وظيفة، كان فاكر ان مش هنجح!
فلازم تستمر فى الحاجة اللى بتحبها حتى لو شاكك في صحة قرارك ده أقرب الناس ليك .
2- افهم التسويق
انا شايف ان التسويق ليه اهمية كبيرة جدا ميقدرش يفهمها اغلب الناس، أكتر درس اتعلمته وفادني جدا كان سلوك البايع والمشتري.
الدرس ده ساعدني افهم ازاى افرق بين المنتجات، وازاى اخلى تسويقي لمنتج حاجة سهل الناس تفتكرها، وازاى أعلن عن منتجي بطريقة تأكد على العلامة التجارية بتاعتى وعلى الموقع بتاعى فى ذهن الناس، وافهم حالة عدم الرضا اللى ممكن تحصل بعد عملية الشراء. مش مهم إذا كنت طبيب أو عامل أو محامي أو عالم .
أدوات التسويق هتفضل ليها اهمية كبيرة جدا ليك. المشاريع الناشئة بتتنافس على رأس المال المستثمر فى المشاريع دى، عشان كدة لازم تفهم ازاى تبيع شركتك للمستثمرين واللى شغالين معاك ولعملائك.
3- استمر في التعليم
مش هتقدر توصل لافضل حاجة ممكن توصلها غير لو استمريت فى انك تتعلم كل جديد.
أول شهادة جامعية ليا كانت في الهندسة، لكن وانا بدرس الهندسة كنت بذاكر مجلة فايننشال بوست من الجلدة للجلدة، وكنت بتعلم منها كتير عن عالم البيزنس.
بعدها بدأت أنا وأصدقاء ليا نادي مالي للاستثمار في البورصة. كان عددنا تسعة، وكل واحد فينا دفع 200 دولار، وكنا بنتعلم ازاى بتشتغل البورصة، ازاى تشتري وتبيع، العمولات، تأثير التقارير المالية ونتايج الأبحاث المستقبلية، وفي النهاية كل واحد فينا خد 221 دولار، اتعلمنا كتير في التجربة دى.
إقرأ المزيد: التسويق بالأسرار – أرجوك متقولش لحد
4- خلى أولوياتك واضحة زى الشمس
اتعلمت بالطريقة الصعبة أن في الحياة دى لازم توزن بين مشاعرك وبين أولوياتك، احساسك بالسعادة من حاجة معينة هو زى ماتكون ماشى في الأرض من غير هدف!
من ناحية تانية، أي خطة من غير شغف ورغبة قوية انك تحققها بتعتبر فراغ.
بشجع الناس كتير أنهم ياخدوا من وقتهم شوية يقعدوا ويفكروا في نقط قوتهم، وفي مهاراتهم مقارنة باللى زيهم، ويحاولوا يزودوها، بس يحافظوا على توازن أولوياتهم.
5- خليك متعدد المواهب
لما بوظف أعضاء في فريقي، بختار منهم اللى اشتغل قبل كده في الكشافة وبدأ شغل خاص وليه مساهمات خيرية وكتب في جريدة الجامعة وكان عضو في فريق رياضي وبيدرب الناشئين.
محتاج ناس عندهم خبرات كتير ومتنوعة، مش خبرات مقتصرة بس على انه يصحى ويروح الشغل ويرجع البيت ينام وهكذا.
6- فكر بره سوق العمل
مش هيوافقنى والدك ووالدتك على النصيحة دى، لكن ده أفضل وقت عشان تسافر وتحاول تطور مجتمعك وتتعلم تعليم عالي إضافي، التعليم مش بيحصل بس في قاعات الدراسة أو في مكتب الوظيفة، والنجاح مش بس مرتبط بالأداء الأكاديمي.
متخليش طردك من الشغل او قفل شركتك فترة تفضل نايم فيها، لكن اعتبرها فرصة تتعلم منها حاجات كتير.
7- الإبداع والعصامية مهمين في أي صناعة
العصامية ليها تأثير إيجابي كبير على أي صناعة. المفكرين المبدعين مبيبطلوش يسألوا السؤال ده: ازاى نقدر نخلى الحاجات أفضل؟
مش مهم المرحلة اللي أنت فيها من حياتك أو شغال في أي مجال أو صناعة، كل حاجة هتستفيد منها وتعرف أفكار جديدة. متخافش تفكر بره حدود التقليدي، فمش معنى أن حاجة شغالة كويس أنه مستحيل نحسنها أكتر.
8- على مهلك واختار صح
ربنا أنعم علي كل واحد مننا بقدرات ومهارات، لازم تختار كويس فين وازاى هتستغل كل مهارة منها.
اللى يضايق انك تشوف ازاى الآباء بيدخلوا أبنائهم في مقررات وجامعات ويختارولهم مستقبلهم المهني.
الموضوع محتاج لوقت طويل عشان توصل لحاجة مختلفة ممكن تقدمها للعالم، أنا مش بطلب منك انك تهد كل حاجة وتقف، لكن بقولك تعملها وانت مليان بالعاطفة والشغف، أو استنى شوية لحد ما تلاقى الشغف والعاطفة جواك.
9- اتعلم من الفشل
لما كنت صغير كان ليا صديق بيقص الحشيش فى حديقة الجيران بـ3 دولار لكل مرة يقص فيها، والدي قدر يتفق مع جارتنا العجوزة انه يقصلها الحشيش فى الصيف، وقبلت الوظيفة من غير مناقشة أو أي كلام.
بعد ما انتهى فصل الصيف وبعد 30 مرة قص للحشيش، جه وقت السداد، عملتلى عصير، وقبضتنى 10 دولار وسألتني ازاى ناوى اصرفها؟
كانت المفاجأة أقوى من أنى أحاول اتكلم، الحادثة دى علمتني كتير عن ضرورة انى اتواصل مع العميل واتكلم معاه عن توقعاتي من البداية وقبل ما ابدأ الشغل، وانى لازم اضمن موافقة كل طرف في المعاملة التجارية.
10- حاول توزن بين العواطف والأولويات
لفترة طويلة جدا فى حياتي، كنت بشتغل كل يوم في السنة وكل ساعة في اليوم، وده كان سبب انى خسرت جوازى وأكتر أهم 3 أصول في حياتي: أولادي التلاتة.
بعد ما كان سرطان البروتستاتا هيقضي على حياتي وعمري 43 سنة، بعدها اتعلمت انى لازم ارتب الأولويات في حياتي، ده هيضمنلى الاهتمام بصحتي، والتركيز أكتر ولفترة أطول على العيلة والأصدقاء.
مهم: 11 درس من الحياة والتجارة
في نهاية التدوينة:
طبعا فى نصايح مش مفهومة، وفى منها مش مناسب ليك، وفى منها اللى جه على الجرح، وفى منها وكأنه بيقصدك، وطبعا هتقول انه طول عشان يكمل العشرة… كل ده مفهوم ومقبول، لكن اللى مش مقبول هو انك متعملش تعليق وتقوللي ايه النصيحة اللى أثرت فيك وليه وايه الخطوات اللى هتعملها عشان تستفيد منها.
وخليك فاكر ممكن تعيش حياتك بس ومتقراش النصايح دى أو تعيش ألف حياة بأنك تقرأ النصايح وتستفيد منها والقرار ليك.
