في فترة الثمانينيات من القرن العشرين كانت شركة الطيران الامريكية كونتيننتال أسوأ شركة طيران في اميركا، وتم اعلان افلاسها مرتين!
وفي وقت قصير سنة ونص تقريبا، قدر جوردن بثون انه يحول الشركة من الأسوأ الى أول شركة طيران في اميركا واختارتها مجلة فورتشن من احسن 100 شركة للعمل فيها، ومن اشهر الجمل لجوردن From worst to first.
سعر سهم الشركة في البورصة الامريكية في بداية شغله في الشركة كان اقل من 2$ ، ولما تقاعد وصل سعر السهم لـ 50$.
مين هو جوردن بثون؟
- اتولد سنة 1941 في ولاية تكساس الامريكية، والده كان طيار على طايرة شراعية لرش الاراضي الزراعية ، فشل في انه يكمل تعليمة في المدارس ، في سن 17 انضم للبحرية الامريكية في وظيفة فني الكترونيات الطيران وفضل 20 سنة في البحرية الامريكية.
- في وقت خدمته عرف ان الطائرات اللي بيعمل لها صيانة مبتتعطلش نهائي مره تانية، وقدر ان ياخد رخصة الطيران النفاثة في الفترة دي.
- بعد التقاعد اشتغل مدير صيانة في شركة طيران تجاري، واترقى وانتقل بين شركات الطيران، وكان دايما بيحقق النجاح في اي شركة بيشتغل فيها. ومن اشهر الشركات هي شركة بوينج الامريكية.
- في سنة 1984 كمل جوردن بثون تعليمة واخد الشهادة الجامعية وسنه 43 سنة.
- اتشهر عنه انه بيقضى وقته مع الفنيين والميكانيكيين اللي بيصلحوا الماكينات.
- سنة 1994 وافق جوردن بثون على ادارة شركة طيران اعلنت افلاسها، اللي مديرها السابق فشل في تغيير اي حاجة فيها.
إقرأ المزيد: دليل لعمل دراسة جدوي كاملة لمشروعك
مواصفات افضل شركة طيران
من اول يوم ليه عرف جوردن بثون اسباب افلاس الشركة:
- ضياع شنط الركاب.
- الغاء رحلات الطيران بسبب تأخيرها عن معادها.
- مفيش فنيين ولا قطع الغيار بالاخص خارج مقر الشركة، وطبعا ده خلى الصيانه تتاخر ايام وشهور، وده خلى الركاب تدور على شركات تانية افضل. وطبعا خسائر الشركة ادت لإهمال مستوى النظافة داخل الطائرة.
- الشركة كان عبارة عن اندماج شركات، فلما بيبوظ كرسي في الطيارة كان بيتغير بألوان مختلفة بديلة من طائرات تانية.
طبعا كل المشاكل دي خلت الروح المعنوية للموظفين سيئة، بس كان فيه امل ان الشركة تواجه التحدي على ايد مدير تنفيذي تاني.
الخروج من الازمة
حسب جوردن بثون الخسائر اللي على الشركة وصلت 5 مليون دولار، وقال للعاملين لو الشركة وصلت لافضل 3 شركات طيران هيوزع نص الملايين الخمسة علي كل العاملين بالشركة حوالي 40 الف موظف.
في الشهر اللي بعده الشركة كانت في المركز الرابع، وبعدها بـ3 شهور وصلت للمركز الاول.
وحقق وعده للعاملين ودفع المال اللي وعد بيه 6 مرات في اول سنه، وكان جوردن يسافر ويوزع المكافأت على العاملين بنفسه، وعلشان يثبت فكرة المكافأة في ذهن الموظف كان بيعمل شيك خاص لكل عامل بعيد عن راتبه.
طبعا التوزيع ده كان له تأثير ايجابي على العاملين، علشان اخذوا وعود قبلها من مديرين سابقين ومتنفذتش!
الموظف راس المال الحقيقي للشركة
الدخل الاضافي خلى الموظفين يغيروا تفكيرهم وسلوكهم،
مثلا في رحلة كان عدد الوجبات اقل من عدد ركاب الطائرة بـ10 وجبات، وقبل توزيع المكافات كانت المضيفة هتأخر الطائرة اكتر من نص ساعة علشان تكمل الوجبات، بعد توزيع المكافأت اختلف تعامل المضيفة عاقبت المظيفة المتعهد المتسبب علشان متتكررش، وعرضت مشروبات اضافية علشان تعوض الركاب.
بسبب تعامل المضيفة الرحلة قامت في معادها ومشتكاش حد من الركاب.
مثال تاني لما يكون فيه زحمة كان موظفي الاستقبال بيساعدوا المسافرين علشان يصعدوا لطايرتهم بسرعة، علشان الرحلة متتأخرش وده المطلوب.
المكافأت بس مش بتحل مشاكل الشركات
مش المكافأت بس هي اللي خلت الشركة تنجح وتهرب من الافلاس، الفلوس دي خلت فريق العمل يغير تفكيره.
المدير يلتزم بكلامه وميغيرش قراراته، ودلوقتي بقى فيه اهتمام بالعمل وبقى فيه روح الفريق، ودي كانت البذرة الأولى لمساعدة جوردن في تنفيذ باقي الخطوات.
- ضم جوردن خبيرا اداري للشركة كان بيقدم الخدمات الاستشارية، وبقى بين فريق العمل في منصب مدير العمليات التنفيذي.
- عملوا مع بعض خطة ادارية علشان يزودوا الارباح ويقللوا الخسائر، ويقيمو رحلات الشركة اللي بتكسب واللي بتخسر علشان يزودوا الاولى ويقفلوا التانية.
- عملوا مراكز وورش للصيانة في الاماكن اللي بتسافر فيها رحلات الشركة علشان يقللوا الوقت لاصلاح الاعطال.
قرارات جريئة
لما سافر جوردن الى كوستاريكا لقي طاقم الطائرة بين دخان المدخنين، في الوقت ده قرر منع التدخين نهائئ.
مدير المبيعات قاله القرار ده هيخلي المدخنين يبعدوا عن الشركة ودي هتعمل خسائر، بس حصل العكس الشركة بقى فيها حجوزات اكتر من المسافرين الكارهين للتدخين واختاروا شركته كونتيننتال.
مهم: افضل طريقة تعرف بيها مشروعك التاني
فين الكمبيوتر بتاعي؟
سنة 1995 عين مدير مالي في الشركة وفي أول يوم عمل سأل عن الكمبيوتر اللي هيشتغل عليه؟ فردوا عليه انهم مبيستخدموش الكمبيوترات في الشركة.
بعدها دخل جوردن الكمبيوتر للشركة علشان يواكب التكنولوجيا الحديثة.
المدير المالي كان بيشتغل على ايجاد تمويل بشروط احسن وجدولة الديون وتقليل الخسائر وزيادة الارباح.
كتاب من الاسوأ الي الأفضل
في 1998 نشر جوردن كتاب سماه من الأسوأ إلى الأفضل، شرح فيه كل خطوات نجاحه في شركة طيران كونتيننتال.
From Worst to First: Behind the Scenes of Continental’s Remarkable Comeback
في سنة 2004 تقاعد جوردن بثون، وتم دمج شركة كونتيننتال مع شركة طيران يونايتد وحملت اسم الأخيرة،
وبعد الاندماج رجعت المشاكل للظهور تاني!
اللي تخرج بيه من التدوينة الطويلة دي هي الموظف المبسوط بينتج عميل مبسوط.
ابدأ من جوه شركتك..
