في صاحب بزنس هدفنا ان احنا نقدملك كل الافكار والدراسات اللي تساعدك تكون صاحب بزنس ناجح،
والتدوينة دي هتكون دليلك لعمل دراسة جدوي كاملة لمشروعك ودا هيكون بأسلوب سهل جدا ومبسط.
يعني ايه دراسة جدوي؟
دراسة الجدوي دي هي عبارة عن عملية جمع معلومات عن مشروع معين، وبيتم تحليل جميع المعلومات دي عشان نعرف اذا كنا هنعرف نعمل المشروع دا فعلا ولا لأ؟ ولو هنعرف نعمله هيكون في ارباح فيستاهل ننفذه ولا خسائر فنلغيه!
ونفكر في بيزنس غيره.
يجب أن نتعلم كيف نعتمد على أنفسنا ، يجب أن نتعلم تخطيط وتنفيذ المشاريع التجارية الخاصة بنا ، ويجب أن نتعلم المغامرة ببنساتنا إذا كنا سنربح الدولارات.
Timothy Thomas Fortune
ازاي اعمل دراسة جدوى لمشروع؟
عشان تبدأ وتعمل مشروعك لازم تكون عارف كل تفصيلة عنه مهما كانت صغيرة، لان ده هيفرق في نجاح المشروع وتحقيق الارباح، وطبعا دراسة الجدوي بتغطي كل الجوانب اللي ضروري تكون مُلم بيها عن مشروعك.
ودراسة الجدوي بتتكون من ثلاثة عناصر رئيسية وهي:
- دراسة السوق
- الدراسة الفنية
- الدراسة المالية
1. دراسة السوق
لازم تدرس السوق قبل ما تفتح مشروعك عشان تشوف السوق لسه في مكان يستوعب المنتج او الخدمة اللي بيقدمها مشروعك ولا لأ؟ وده بتعرفه من كم الطلب علي المنتج او الخدمة من المستهلكين، وهل الكمية المطلوبة بتزيد ولا بتنقص؟
فضروري جدا تنزل ارض الواقع وتشوف احتياجات السوق، كمان هتعرف عدد المنافسين لمشروعك، وسياسة المبيعات لنفس المنتج او الخدمه اللي بتقدمها مع اختلاف اساليب التوزيع والتسعير وجودة المنتج أو الخدمة.
إقرأ المزيد: افضل طريقة تعرف بيها مشروعك التاني
2. الدراسة الفنية
هنا بتحاول تعرف جميع احتياجات المشروع، يعني بتحدد كل حاجة المشروع بتاعك محتاجها ولازم توفر جميع الاحتياجات لضمان نجاح المشروع من:
- مقر المشروع.
- المعدات والآلات اللي بتستخدمها في مشروعك.
- المواصفات الفنية للمنتج بتاعك.
- تحديد العمالة اللي محتاجه.
3. الدراسة المالية
هنا بيكون الهدف من الدراسة المالية لمشروع هو معرف نسبة الارباح، العائد من المشروع، وكمان مصادر التمويل اللي ممكن تحتاجها وعشان تعمل الدراسة دي لازم توافر شوية حاجات هي:
1. معرفة جميع تكاليف المشروع
- تكاليف التأسيس: بتتحملها مرة واحد من عمر المشروع وهى زي الرسوم القانونية – رسوم الترخيص -رسوم عمل سجل تجاري – استخراج بطاقة ضربية.
- تكاليف رأسمالية: تكاليف بتتحملها عشان تبدأ تجهز مشروعك زي مقر المشروع – الآلات والمعدات – سيارات وغيرها من الاصو الثابتة.
- تكاليف التشغيل: تكاليف بتصرفها بشكل دوري وفي الاغلب بتكون مصاريف شهرية زي الايجار – اجور عمال – فواتير كهرباء ومياه وغيرها.
2. حساب الربح الاجمالي
ودي عبارة عن اجمالي ايرادات المبيعات مطروح منها تكاليف المنتجات المباعة.
3. حساب صافي الربح أو هامش الربح للمشروع
وده بيكون عبارة عن الربح المتبقي بعد خصم جميع المصاريف،
يعني صافي الربح = اجمالي الربح – المصاريف التشغيلية
يعني لو انت بعت منتجات بمبلغ 50,000 جنية، وكانت تكلفة المنتجات دي 20,000 جنية، وعند مصاريف تشغيل ايجار 2.000 جنية – اجور عمال 10,000 جنية.
هتحسب صافي الربح؟
مجمل الربح = اجمالي الايرادات – تكلفة المبيعات
مجمل الربح = 50.000 – 20.000 = 30.000 جنية
اجمالي المصاريف التشغيلية = 2.000 + 10.000 = 12.000 جنية
صافي الربح = اجمالي الايرادات – اجمالي المصروفات
صافي الربح = 12.000 – 30.000 = 18.000 جنية
مهم: 11 درس من الحياة والتجارة
عايز اقولك علي حاجه اخيرة دراسة الجدوي بتختلف حسب كل مشروع وحجمه، يعني دراسة جدوي لمشروع صغير عكس المشروع الكبير، حجم الداتا والمعلومات اللي متجمعة عشان الدراسة مختلف وكذلك نوع المشروع اذا كان تجاري او صناعي او خدمي.
