دراسة الجدوى التسويقية هي دراسة السوق علي ارض الواقع وهي جزءا مهم جدا من دراسة الجدوى التفصيلية، وبتعرف عن طريقها اذا كان المشروع ده هيعرف يقدم الخدمة او المنتج بتاعه للمستهلك ولا لأ؟
كمان هتقدر توقف علي نقطة مهم جدا، اذا كان المشروع ده هيقدر ينجح وينافس ويسمع جامد في السوق ولا هيفشل وهيقفل ولا حد هيسمع عنه! وده عشان دراسة الجدوي التسويقية بتعرف منها درجة المنافسة، وسياسات التسعير، وغيرها من الأمور الحساسة لأي مشروع.
وعشان تعمل دراسة جدوى تسويقية صح لازم تكون عارف حاجة مهم جدا وهي علاقة المنتج او الخدمه اللي هيقدمها مشروعك بالسوق عاملة ازاي؟ ودي بتكون متوقفة علي عاملين مهم جدا:
أ- الطلب على المنتج أو الخدمة من حيث الزمان
هنا بتشوف الطلب علي المنتج او الخدمه اللي هيقدمها مشروعك علي مدار السنة عامل ازاي؟ هل هو مستمر طول السنة ولا نظام سيزون وشكرا علي كده، ده مهم جدا تعرفه.
ب- الطلب على المنتج أو الخدمة من حيث المكان
هنا بتشوف حضرتك المنطقة او النطاق الجغرافي اللي انت هتفتح فيها عامله ازاي، يعني هي فعلا محتاج مشروعك ولا هي مستكفيه، يعني لو انت هتفتح مشروع كافية مثلا، وحواليك خمس كافيهات تانين وشايفهم مكفين المنطقة!
متروحش تفتح جنبهم وتقول المنطقة حلوه وشغاله وهكسب فيها، لأ طبعا هتخسر وهتقفل بسرعة عشان انت هنا دخلت نفسك في منافسة جامده مع الكافيهات التانية اللي ليها اسم ومشهورة في المنطقة.
الاسواق بصفة عامة غير متوقعة، ولهذا يجب ان يكون لدي الفرد سيناريوهات مختلفة.
George Soros
المعلومات الاساسية لعمل الدراسة التسويقية
المعلومات اللي هتحتاجها عشان تعمل دراسة تسويقية مظبوطة، المعلومات دي بعتبرها هي العناصر الاساسية لعمل الدراسة بشكل محترف وهي:
- دراسة السوق
- المنتج والسوق المستهدف
- مستوى الطلب
- المستهلكين
- المنافسة والعرض
- التوزيع
- الخطة التسويقية
إقرأ المزيد: دليل لعمل دراسة جدوي كاملة لمشروعك
1. دراسة السوق
دي تعتبر حجر الاساس ونقطة البداية لتحديد نجاح المشروع من عدمه ايا كان نوع المشروع تجاري، صناعي أو مشروع خدمى، وده انا وضحته في الاول لما قولتلك تنزل علي ارض الواقع وتشوف مشروعك هيكون عامل
ازاي والناس هل هي محتاجه ولا لأ.
وهنا بنطبق نظرية العرض والطلب لان نجاح المشروع من عدمه متوقف علي سلوك المستهلكين، وكمان لو مشروعك بيقدم منتج او خدمة بجودة عالية وسعر مناسب للمستهلكين ده هيساعدك تكون منافس قوي في السوق.
2. المنتج والسوق المستهدف
هنا لازم تكون عارف مواصفات المنتج اللي هتقدمه واستخداماته كويس، وكمان تكون عارف هو هيخاطب وبيترجت انهي شريحة من المستهلكين، وكمان تكون واخد في حسابك المنتجات البديلة اللي ممكن تنافس المنتج بتاعك.
3. مستوي الطلب
هنا لازم تكون عارف حجم الطلب علي المنتج او الخدمة اللي بتقدمهم، وكمان تكون عارف معدل التغير اللي ممكن
يحصل علي حجم الطلب علي المنتج او الخدمة اللي بتقدمها، يعني المنتج بتاعك مطلوب طولت السنة
ولا سيزون وينتهي، وهل التغير ده هيقصر علي سعر المنتج ولا لاء .
4. المستهلكين
العنصر الاهم عشان لازم تكون عارف حجم الاستهلاك للمنتج، دوافع شراء المنتج أو الخدمة، وانهي شريحة من المستهلكين بتشتري، وشكل استهلاكهم عامل ازاي.
5. المنافسة والعرض
لازم تدرس النطاق الجغرافي، المنطقة اللي هتفتح فيها المشروع كويس جدا، وكمان تشوف كام واحد بينافسك في المكان ده وهل ممكن ينزل حد تاني ينافسك في السوق ولا لأ؟ بردو مهم جدا تشوف المنتج بتاعك بينافس منتجات محلية بس ولا في منتجات مستوردة بتنافسك.
6. التوزيع
لازم تكون عارف هتوزع المنتج بتاعك ازاي، وهتعمل دعاية وتسويق ليه ازاي، وهتكون التكلفة بتاعتها كام؟
مهم: 11 درس من الحياة والتجارة
7. الخطة التسويقية
بتشوف هتعرف الناس – المستهلكين بالمنتج او الخدمة بتاعتك ازاي، ولازم يكون العرض مغري وجذاب ومثير لاهتمام المستهليكن، وده عشان يحفزهم انهم يشتروا او يتعاملوا معاك، وخد في اعتبارك لو عرض قوي هتبيع بشكل كويس جدا.
في الاخر احب اقولك ان دراسة الجدوى التسويقية أساس جميع دراسات الجدوى، و دراسة الطلب
على المنتج اللي عايز تعمله بيكون من أهم مراحل الدراسة التسويقية، لان كل ما كان في دقة بالتنبؤ بالطلب
علي المنتج او الخدمه اللي بتقدمها، دا بيأثر بشكل كبير في نجاح المشروع، وعدم الدقة أو القصور فى عمل الدراسة التسويقية ده ممكن يودينا لفشل المشروع.
