لازم تكون عارف ازاي تحسب نسبة الربح من مبيعاتك، لان ده مهم جدا ليك ولمشروعك، وطبعا انك تعرف ازاي تحسب هامش الربح او مكسبك من مبيعاتك ده هيساعدك انك تاخد قرارات كتير مهمة لمشروعك تساعدك بعد كدا في الوصول لأعلي نسبة ارباح من مبيعاتك.
وهنا تيجي مهمة حساب نسبة الربح من المبيعات او المصطلح الاشهر هو هامش الربح، بس الاول كده لازم تكون عارف حاجتين مهمين عشان تعرف تعمل الحسبة دي:
إقرأ المزيد: دليل لعمل دراسة جدوي كاملة لمشروعك
- تحديد صافي المبيعات: في ناس بتاخد اجمالي المبيعات وبتنسي تنقص منها حاجة مهم جدا من المبيعات وهي المنتجات اللي بترجع للمورد نتيجة عيب في التصنيع او تالفة او غيرها من الاسباب، فلازم حضرتك تبقي عارف مبيعاتك الحقيقية وتقدر تحسبها من المعادلة دي = اجمالي مبيعاتك – المرتجع او التالف وبكده تكون عرفت صافي مبيعات الشركة.
- تحديد تكاليف المبيعات: هنا بتحسب اي مصاريف اتصرفت علي المنتجات بتاعتك لغاية لما تبعها، المصاريف دي زي مواد الخام -العمالة -او اي مصاريف تشغيلية تانية.
مثل يوغسلافي
ازاي تحسب نسبة الربح من مبيعاتك
بمعادلة سهلة وبسيطة = ( صافي المبيعات – تكلفة المبيعات ) / صافي المبيعات × 100
تعالي نفهم بالمثال ده، لو شركتك باعت مبيعات 100,000 جنية وكان عندك مرتجع 20,000 جنية وتكاليف المبيعات 40,000 جنية وعايز تحسب نسبة الربح من المبيعات؟
- صافي المبيعات = (ا جمالي المبيعات – المرتجع )
= 20,000-100,000 =80,000 جنية. - نسبة الربح من المبيعات (هامش الربح) = (80,000-40,000)/80,000 × 100 = 50%.
وخلي بالك كل ما زاد معدل هامش الربح كل ما كان مشروعك ومبيعاتك كويسه جدا،
طيب لو عايز اعرف قيمة الربح من المبيعات؟
- = صافي المبيعات – تكلفة المبيعات، يعني لو علي المثال اللي معانا هتكون قيمة المبيعات = 80,000-40,000= 40,000 جنية.
ازاي تزود نسبة ارباحك؟
عشان توصل لاعلي هامش ربح، هتعمل ايه؟ بسيطة.. هتقلل تكاليفك و هتزود مبيعاتك بس كده! لكن ازاي؟
تقليل التكاليف
- قلل مصاريفك التشغيلية يعني لو بتدفع فلوس كتير في دعاية واعلان لمبيعاتك وحاسس انها مش جايبه نتيجه دور علي طريقة تانية مثلا استخدم السوشيال ميديا ووفر فلوس الاعلانات.
- غير مناديب المبيعات عندك ممكن في ناس شبعت وعادت مكسله تنزل تشتغل عين ناس جديدة بتكلفة اقل.
زيادة المبيعات
- لو شغال من زمان بنفس سعر البيع لمنتجاتك لازم ترفعه شويه عشان ترفع من نسبة ربحك بشكل يخليك تنافس في السوق.
- لو عندك منتجات قديمة او مش عليها حركة بيع كتيره، ياما تقلل سعرها عشان تبيعها او اعمل عرض عليها مع منتج تاني عليه طلب.
- حاول تحافظ علي العميل بتاعتك ودور ازاي تجذب عملاء جدد.
مهم: 11 درس من الحياة والتجارة
لازم تكون عارف كويس ان نجاح اي مشروع متوقف علي المكسب، فعشان تقيس اداء مشروعك استخدم مؤشر هامش الربح.
