كلنا عارفين ان مشروع السوبر ماركت او البقالة من المشروعات الاستثمارية الكويسة جدا ونقدر نقول السهلة مقارنة بمشاريع تانية وبيحقق ارباح كبيرة، خاصتا لو انت عملت دراسة جدوي ليها وفاهم المشروع كويس، بس الربح ده متوقف علي شوية حاجات منها:
- مكان السوبر ماركت.
- حجم المبيعات اليومية.
- مصاريف التشغيل.
- دخل العملاء.
ونصيحة ليك اول ما تفتح السوبر ماركت اشتغل بنظام محاسبي داخل المكان عشان تكون عارف تقيس ربحية المشروع.
يقوم النظام الاجتماعي والاقتصادي بأكمله على الإنتاج من أجل الربح وضرورة النمو التي لا يمكن أن تستمر.
Noam Chomsky
ازاي احسب ارباح السوبر ماركت ” البقالة “
قبل ما ندخل في طريقة حساب الارباح في كذا مصطلح لازم تكون عارف الفرق بينهم الاول:
- اجمالى الربح: دي بتكون عبارة عن سعر بيع سلعة او خدمة معينة مطروح منها قيمة (تكلفة السلع او الخدمة).
- اجمالى المصروفات التشغيلية: دي كل المصاريف التشغيلية اللي بتدفعها زي شراء بضاعة – ايجار – فواتير كهرباء ومياه – مرتبات عمالة ضرائب وغيرها من المصاريف.
- صافي الارباح: ده بيكون عبارة عن الربح المتبقي بعد خصم جميع المصاريف.
تعالو نفهم المصطلحات دي بمثال، لو سوبر ماركت مبيعات منتج معين عنده 30 جنية وهو اشتري المنتج ده من تاجر جملة بـ 20 جنية هنا هيكسب كام من بيع المنتج ده؟
هنا يجي مصطلح اجمالي الربح = 30-20 = 10 جنية ده الفرق بين سعر البيع والشراء.
طيب لو السوبر ماركت حقق اجمالي ايرادات من بيع المنتجات مبلغ 40,000 جنية وعنده مصاريف تشغيلية بمبلغ 20,000 جنية، هنا يكون السوبر ماركت صافي ربحه كام؟ ، 40,000-20,000 =20,000 جنية.
إقرأ المزيد: افضل طريقة تعرف بيها مشروعك التاني
ازاي ازود ارباح السوبر ماركت؟
قولنا الربح = الايرادات مطروح منه المصروفات، فعشان تزود ارباح السوبر ماركت هما حاجة من اتنين ملهمش تالت!
ياما هتزود مبيعاتك فتكسب ياما تقلل مصاريفك وبردو هتكسب، وطبعا الافضل انك تعمل الاتنين مع بعض قدر الامكان.
زيادة المبيعات
- ياما تبيع منتجات اكتر وتنشط حركة المبيعات بانك تعمل عروض علي المنتجات، وتبدأ الناس تشتري كتير، وهنا انت بتقلل هامش الربح بتاعك شويه مقابل انك تبيع كميات من المنتجات.
- ياما تحاول تشتري بسعر اقل وتكبر الفرق بين سعر البيع وسعر الشراء.
- انك تدخل منتجات جديدة.
تقليل التكاليف
- تحاول تجيب عروض سعر اقل من تجار الجملة.
- حاول يكون عندك مخزون من المنتجات عشان لو سعرها رفع، ده هيوفر معاك وهتقدر تتحكم في سعر البيع.
- حاول علي قد ما تقدر تقلل من مصاريف التشغيلية.
خطوات البدء فى مشروع السوبر ماركت
1. عمل دراسة جدوي:
لو مش عارف يعني ايه دراسة جدوي ولا عارف بتتعمل ازاي؟ صاحب بزنس هيساعدك من خلال تدوينة سابقة بعنوان دليلك لعمل دراسة جدوي كاملة لمشروعك، وهتقدر توصل لمعلومات زي:
- هتختار المكان الصح لسوبر ماركت بتاعك.
- هتعرف السوق بشكل كويس قبل ما تفتح السوبر ماركت.
- هتعرف كام منافس ليك في المنطقة اللي هتفتح فيها.
- هتعرف طبيعة عملاء المنطقة.
2. التسويق:
- اعمل صفحة بإسم السوبر ماركت ونزل عليها المنتجات اللي بتبيعها.
- اعمل خدمة توصيل للمنازل.
- اعمل عروض علي المنتجات بتاعتك.
بإختصار حاول توصل لأكبر عدد من العملاء.
مهم: 11 درس من الحياة والتجارة
معلومة أخيرة: دراسة الجدوي وفن التسويق بيضمنوا ان تكون نسبة نجاح المشروع كبيرة، لان بتكون كل حاجة تقريبا مُخطط ليها سواء قبل او بعد ما تفتح مشروعك، وده بيقلل الخسائر اللي ممكن تحصل للمشروع.
