Be the best at what matters most ده كتاب مهم جدا، مش بس علي مستوى البيزنس لا على مستوى الحياة عامة، فكل واحد مننا ليه حياة مليانة بالتفاصيل والأولويات، والوقت بيعدى بسرعة من غير إنجازات كبيرة!
فالمؤلف هنا بيقولنا ان ” الناجحين مش بس اللى بيعملوا معظم الحاجات– لكن اللى بيعملوا الحاجات المهمة” وعشان كده بتحس بضغط عصبى لما متركزش على اللى مفروض انك تركز عليه ودا باختصار تلخيص الكتاب.
عندما تتوقف عن ملاحقة الأشياء الخاطئة ، فإنك تعطي الأشياء المناسبة فرصة لتصل إليك.
Lolly Daskal
ايه هو الأهم وازاى تبدأ بيه؟
فى مقوله لألبرت أينشتاين بتقول “لو كان قدامى ساعة واحدة بس انقذ فيها العالم ، فهأقضى خمسة وخمسين دقيقة في تحديد المشكلة و خمس دقايق في انى الاقى الحل” يبقى الأساس انك تحدد ايه أهم شيء بالنسبة ليك عشان تركز عليه ويكون هو الموضوع الرئيسى.
المجهود الكبير بيجى لما توظف عقلك عشان يحدد ايه هى الحاجات المهمة، فهل الموضوع ده صعب يتحقق؟
ستيف جوبز بيقول “الموضوع محتاج شغل كتير عشان يبقى تفكيرك صافى كفاية عشان تخلى الأمور بسيطة.
قصة مطعم خالد
خالد شاب مصري مجتهد، قرر يفتح مطعم في أفريقيا و كان هدفه ازاى يبهر الأفارقة بالأكلات الشرقية والحلويات كمان، واجتهد أكتر انه يطور قسم المخبوزات وعمل افتتاح ودعى أصحاب محلات تجارية قريبة من المطعم، وأجر فرقة استعراضية أفريقية قدمت عروض ممتعة، وعمل حملة تسويقية علي مواقع التواصل الاجتماعي لحد ما نجح خالد انه يبهر المدعوين لكن بعد فترة اكتشف أنه بيخسر باستمرار، فكل اللى فات ركز علي حاجة مهمة بالنسبة لخالد وهو أنه يكون الأفضل في إبهار المستهلك الإفريقي فهل ده المهم ولا الربح؟
بعدها قرر خالد يركز علي الحاجات المهمة اكتر وهي انه يقدم أطباق بتناسب الذوق الإفريقي بجودة أفضل من المنافسين عشان يحقق أرباح، وبس.
بدأ خالد يركز انه ينقى الخضار واللحوم الفريش ويهتم انه يختار فريق عمل و يهتم بالجودة ويقلل تكاليف صناعة الحلويات الشرقية ويبدلها بعصاير فريش زى ما الأفارقة متعودين وهو دلوقتى مشغول بافتتاح فرعه التالت.
إقرأ المزيد: افضل طريقة تعرف بيها مشروعك التاني
لما تسعي عشان تحقق كل شىء، بتتجاهل الحاجات المهمة!
عشان تحدد الحاجات المهمة اكتر فى شغلك أو في حياتك فده محتاج تفكير ، كمان لازم يكون عندك شغف بالحاجات المهمة ، وخليك عارف أن المقاس الواحد مش مناسب للكل.
ازاى بتفوز الشركات اللى ليها علامة تجارية؟
- أمازون: بتركز علي سهولة المعاملات التجارية.
- كوكا كولا: انها تكون موجودة في كل مكان بمنتجات معينة.
- ابل: منتجات مبتكرة وسهلة فى استخدامها.
- ستاربكس: مجموعة مختلفة من منتجات القهوة.
- مايكروسوفت: بتساعد عملائها يستغلوا التطور التكنولوجي.
قاعدة التلاتة في تسعين يوم
ايه الحاجات التلاتة اللى مفروض تعملها او تحسنها خلال التسعين يوم اللى جايين؟
المؤلف بيقولنا أن فى شركات كتير اشتغلت على قاعدة التلاتة في تسعين يوم وكانت النتايج كويسة جدا، وهي قايمة على:
- حدد أكتر 3 حاجات مهمة لشركتك أو شغلك.
- حدد المسئول عن كل حاجة منهم.
- حدد طريقة تقيس بيها نجاحك في تنفيذ الحاجات دى.
- اعمل جدول زمني لكل حاجة منهم.
- حدد مكافأة لما المسئول ينجح في انه ينفذ المطلوب منه عرفه بيها قبل ما تحمله المسئولية دى عشان تكون دافع وحافز ليه.
دلوقتى، ازاى استفدت أنا من الكتاب؟
بدأت أركز علي العميل أكتر، فى أسواق بتهتم بالسعر أكتر من الجودة زى السوق المصري اللى بياخذ من فيتنام أكتر من 5 آلاف طن فلفل أسود سنويا، 90% منها جودة درجة تانية (الجودة الأقل بتكلف أقل)، وعشان كدة فمش من الحكمة أنى أقدم ليه الأفضل بجودة عالية وبقول للعميل المصري أن الفلفل ده مختلف عن الفيتنامي، وبقدم ليه أكتر من درجة جودة بأسعار مختلفة وبسيب العميل يختار اللى يناسبه، وبتابع أسعار فيتنام يوم بيوم.
أما سوق الخليج فبتهتم بالجودة والتعبئة والشكل النهائي، فمثلا القرنفل بيجى من اندونيسيا وجزر القمر، لكن جزر القمر معندهمش تعبئة كويسة، وعشان كدة ممكن تعمل علب تعبئة مبهرة في مصر وتبعتها لأفريقيا للتعبئة وبعدين تبيعها في الخليج، واللى بيفكر يبنى مصنع تعبئة كويسة في أفريقيا فهيكون عنده استثمار كويس جدا.
مهم: 11 درس من الحياة والتجارة
كمان من المواضيع المهمة اكتر اللى انتبهت ليها بعد ماقريت الكتاب هو أن الأفارقة شعب طيب يستحق الدعم، ومش من العدل نبص لهم على أنهم عمالة بمرتبات قليلة ، وأنا ببص لهم على أنهم شركائي في كل خطوة وفي كل نجاح وهما ضمن أولوياتي.
انتهي تلخيصي للكتاب ودلوقتى بوجه كلامى للناس اللى بيقرأ التدوينة، طبعا فى ظروف اقتصادية صعبة في أغلب بلادنا، وجالى اتصالات من أصدقاء شغالين في الخليج خايفين من تغيير وضعهم المستقر من سنين وبقوللهم دوروا عن الفرصة المختفية ورا الازمة دى.
فى البداية خليك متأكد أن ربنا مبيقدرش إلا الخير، وبعدين اكتب الحاجات المهمة اكتر ليك ، وابدأ كل يوم خطوة عشان تحسن الحاجات دى.
لكن الاستسلام واليأس واللوم مش هيحققوا أي شيء، عشان كدة ابدأ من النهاردة واتأكد أنك هتجني الخير بكرخ بإذن الله.
