مليونير في دقيقة واحدة – The One Minute Millionaire هو عنوان الكتاب اللى ألفه مارك هانس و روبرت ألن، واللى اتنشر في يناير 1998، ألفوا وساعدوا في تأليف كتب تحفيزية كتير اللي بتساعدك تفهم ازاى تحقق الثروة والنجاح التجاري، وكان هدفهم يخرجوا أكتر من مليون مليونير للوجود، عن طريق كتاب أخرجوه بطريقة مبتكرة.
20% من الزبائن يتسببون في 80% من حجم الأعمال.
كانوا شايفين أن الناس بتنقسم لنوعين:
اللي بتستخدم النص اليمين من مخها، واللي بتستخدم الشمال. وزى ماهو معروف، لكل نص من المخ طريقته الخاصة بيه في التعامل مع الأشياء، وعشان كده قسموا كتابهم نصين، نص جه على صفحات الكتاب الشمال بيتكلم عن صراع المخاوف مع الأحلام، والتانى على الصفحات اللى علي اليمين عبارة عن نقط قصيرة، ومش مهم انت بدأت بأى واحدة فيهم، لان الفكرة واضحة على الناحيتين من غير أي تعارض أو تناقض.
والدقيقة الواحدة في العنوان المقصود بيها أنك لما تمشى بالأسلوب الصحيح لما تيجى تحقق أي حاجة، فاللى حاولت تحققه مش هياخد منك أكتر من دقيقة جهد واحدة.
فهما شايفين أن الطريق للغنى لازم يعدى على واحدة من الطرق دى أو أكتر:
- الاستثمار (سندات/ أسهم/ شهادات إيداع)،
- عقارات (بيع وشراء)،
- التجارة (ترويج منتجات/ خدمات/ أفكار)،
- الانترنت.
وشايفين كمان أن كل مبتدئ في عالم تحقيق الثروة لازم يبدأ بفكرة تجارية كويسة، وبعدين ينفذها بكل قوته وكل الموارد اللى عنده ، وبعدين يعمل علاقات تجارية مع الناس اللى عندهم الموارد لتانية الى هتساعدهه يحقق حلمه.
بعد كده هيكون عنده رغبة قوية انه يبقى غنى، وقناعة انه يقدر يحقق ده، وأخيراً ايمانه بانه يستحق أنه يكون غنى.
إقرأ المزيد: التسويق بالأسرار – أرجوك متقولش لحد
كل حاجة بدأت بـحلم
الطيران، العربيات، الكهرباء، السفر للفضاء، فى منها اتحقق وفى اللى لسه مجاش وقت تحقيقة.
أنت كمان لازم تحلم، غمض عينيك واتخيل هتكون فين بعد خمس سنين. اللى يهمنا هنا هو أنك متفكرش فى أهدافك، لكن فكر من أهدافك. ماتفكرش في بيت أحلامك، فكر وأنت قاعد مرتاح جوه البيت: ايه اللى بتشوفه– وتسمعه – وتشمه؟
الطريقة البسيطة دى اشتغل عليها ناس ناجحين كتير، وبرغم انها بسيطة ، لكنها ساعدت جاك نيكلوس يبقى أفضل لاعب جولف في العالم، وهو كان بيتخيل ازاى عايز يضرب كل ضربة بمضربه، وبيعيش الخيال والحلم ده، وبعدين يروح يحققه.
كنزك قدامك في حوش بيتك
في 1870، راسل كونويل كان من ضمن قافلة سياح أمريكيين عشان يظهروا الجمال بين نهر دجلة والفرات، وسمع قصة الدليل العربي عن المزارع النشيط علي حافظ، اللى ساب زراعة أرضه بعدما سمع قصص كاهن بوذي عن حقول الألماس الأسطورية، علي مسابش مكان إلا ودور فيه عن الألماس، لحد ما ضاع شبابه وضاعت ثروته وضعفت قوته ومات عجوز.
بعد فترة قصيرة من وفاة علي –اكتشفوا ألماس كتير في الأرض الزراعية اللي كانت ملكه.
الألماس اللى بتدور عليه مش هتلاقيه فوق الجبال ولا تحت المحيطات، لكن هتلاقيه في حوش بيتك، ومش عليك غير أنك تحفر بايدك عشان تلاقيه.
رجع كونويل لبلده واحترف الخطابة في قصة حقول الألماس، وسمع خطبه التشجيعية ملايين الناس، وجمع هو الملايين!
إياك تعيد اختراع العجلة
مبدأ مهم جدا، محتاج منك تستفيد من خبرات الناس التانية، وأسهل طريق للغنى هو أنك تتدرب شخصيًا وتشتغل مع غنى عصامي وراثة الفلوس ملهاش علاقة بالذكاء.
اتعلم كل اللى يعرفه وقابل كل معارفه، واعمل اللى بيعمله– بطريقة احسن. انك تتعلم فكرة واحدة ممكن يوفر عليك عشر سنين من الجهد والدراسة.
الفرد لوحده مش كفاية عشان كده أنت محتاج لفريق من الناس يساعدوك ويكملوا اللى ناقص عندك من خبرات ومهارات وقدرات، حوار واحد على ترابيزة حكيم بيساوى دراسة شهر في الكتب.
قصة فيلم روكي وكفاح سلفستر ستالوني
في سنة 1974 كان سيلفستر ستالوني ممثل وكاتب سيناريو فاشل ومفلس , لكنه لما حضر ماتش ملاكمة بين مغمور بيناطح محمد علي كلاي ، جيتله فكرة فيلمه المشهور Rocky.
رجع سيلفستر لبيته وانكفى لمدة 3 أيام على كتابة قصة الفيلم، وبعدها بدأ يروح لشركات إنتاج الأفلام عشان يصور قصته. في البداية الشركات معجبتهاش القصة، لكن بعد كدة بدأت الفكرة تعجب بعضهم، لكنهم رفضوا أن المغمور ستالوني يكون هو بطل الفيلم، لكنه أصر بكل قوته على الشرط ده.
بدأت العروض عشان يشتروا قصة الفيلم من 20 ألف دولار أمريكي ، لحد ما وصلت 300 ألف دولار أمريكي، لكن ستالوني رفض أنه يعيش باقى حياته يسأل:- لو كنت أصريت على دور البطولة كان ايه ممكن يحصل؟ لكن هو كان محظوظ لما وافقت شركة تديله دور البطولة، مقابل 20 ألف دولار للسيناريو ومرتب أسبوعي ضعيف.
في سنة 1976 فاز فيلم روكي بجوايز كتير، وحقق شهرة مكانتش تخطر على بال حد ، وفضلت أجزاء الفيلم مستمرة لحد ما وصلت ستة.
اتعلم زى ما اتعلم وارين بافيت
مؤلفين الكتاب بيأكدوا على انك لازم تتعلم على ايد مدرس / أستاذ ناجح، زى ما عمل وارن بافيت، وهو في سنة التخرج في الجامعة قرأ كتاب اسمه “المستثمر الذكي” لبنجامين جراهام، فدور بافيت عن الكاتب لحد ما لقاه شغال مُدرس في جامعة كولومبيا، فسجل في الجامعة دى عشان يدرس على ايد الكاتب واخد درجة أستاذ في الاقتصاد.
مهم: افضل طريقة تعرف بيها مشروعك التاني
حاول بافيت بعد التخرج يشتغل في مؤسسة بنجامين جراهام الاستثمارية بكل الطرق، لدرجة انه عرض يشتغل فيها من غير مقابل، لحد ما اتقبل بعد 3 سنين من المحاولات، عشان يقضى بافيت سنتين تانيين عشان يتعلم من مدرسه.
لما كان عنده 25 سنة رجع بافيت لموطنه (أوماها) وكون مع سبعة مستثمرين شركة “أصدقاء بافيت” للاستثمار، وكانت حصته 100 دولار، وبعد خمس سنين، بافيت شق طريقه عشان يبقى أشهر وأغنى مستثمر.
المعنى ده هنلاقيه فى مقولة بافيت: “قل لي من هم أبطالك في الحياة، وسأقول لك ماذا ستصبح في الحياة“.
إذا كنت متفتح وعايز تتعلم، فكل شخص هتقابله هيعلمك –بالصدفة- فى حاجة هتزقك لقدام، طبعا التعليم المقصود هنا ملوش علاقة بالشهادات اللى هتاخدها وحفظك للى مكتوب فى الأوراق.
خلاصة الكتاب:
الكتاب بيحاول يدى تفاؤل للناس اللى بتقرأه وبيشجعهم يشتغلوا باجتهاد ويجمعوا فريق عمل متماسك ورا فكرة ليها قيمة، وبيحكى قصص نجاح لناس مكانش معاهم راس مال للبداية أو إمكانيات، لكن الفكرة اللى حاولوا يحققوها جيتلهم باللى نفسهم فيه
