فى حد سأل سؤال على موقع كورا ليه مشاريع الكافيهات بتفشل، فجاوب عليه Peter Baskerville بأسباب فشل معظم مشاريع الكافيهات اللى بيقول أنه أسس وفتح أكتر من 20 كافيه بنفسه، وقال أن الفشل المقصود مش ان الكافيه يقفل، لكن هو فشل تجاري فى انه يحقق ربح كويس، ربح يساوى مجهود المؤسس والمدير للكافيه، بمعدل اقرب لمعدلات الربح من المشاريع التجارية اللى زيه، لما تعمل مقارنة بين رأس المال المستثمر وساعات العمل وصافى الربح.
بيع عصير الليمون
في الغرب فى ثقافة تجارية منتشرة قايمة على ترابيزة لبيع عصير الليمون، وده أسهل مشروع تجاري ممكن اى حد يبدأ بيه. هتختار زاوية فى الطريق تكون زحمة، تنصب عليها ترابيزتك، هتحط عليها عصير الليمون اللى عملته، وترص الكوبيات وتحط يافطة عليها سعرك وتستنى الزباين.
الفكرة دى اتطورت شوية وبقت فكرة مشروع كافيه او مطعم، فالموضوع يبانلك انه سهل، ايه الصعب فى انى اعمل العصير او الاكل؟
السهولة المزيفة دى بتخلى الناس اللى معندهاش خبرة انها تجرب الموضوع، والناس دى ميعرفوش ازاى يسعروا منتجاتهم، أو يخافوا من المنافسين فيقللوا أسعارهم، وبكدة يا اما ميحققوش اى ربح او يخسروا ويطلعوا من الحلبة مهزومين، لكن لو عندك خبرة تجارية فمفيش مشكلة تبدأ بمشروع زى ده.
مشروع الكافية
خلينا نرجع للمثال اللى فات، لو الكافيه حقق أرباح قليلة، صاحبه هيفرح بيها في البداية، وبعد كده هيبدأ يمل ويشتكى من قلة الربح قصاد المجهود اللى بيبذله، وهيبدأ يعرف الحقيقة – مش ممكن يستمر من غير ما يدخر مبلغ للطوارئ، وعشان يكبر المكان ويعمل تسويق ويحسن جودة الخدمة ويدفع رواتب أعلى عشان يشغل عمال عندهم مهارة عالية وخبرة، ويحافظ على ولاء العمال اللى شغالين معاه ويضمن انهم مش هيسيبوه بسرعة.
باختصار، ممكن المشروع ينجح انه ميخسرش، لكن ممكن يفشل انه يستمر ويتطور ويكبر. بدأ بيتر يتكلم عن أهم الأخطاء اللى بيقع فيها اللى بيأسس الكافيه فقال:
1- صرف الميزانية فى حاجات مش هتحقق ربح
في البداية ممكن تسمع نصايح من ناس مش مؤهلين انهم ينصحوك اصلا، فيخلوك تصرف الفلوس فى حاجات مش هتزود ربحك، بدل ما تصرفها على التسويق، وتخليها تجربة كويسة للعملاء، وده اللى بيخلى الفلوس تنقص.
في بداية أي مشروع، متصرفش الفلوس غير لما تكون متأكد انها هترجعلك تانى وفوقيها ارباح كمان، يا اما كدة يا اما تخسر.
إقرأ المزيد: التسويق بالأسرار – أرجوك متقولش لحد
لما تفتح مطعم، وتشغل طباخ شاطر، هتلاقيه بيطلب منك تشترى مطبخ غالي، ودى حاجة مفيش شك انها مهمة، لكن الأهم منها هى تجربة زبون المطعم، من اول ما يقعد على الترابيزة ويستخدم المعلقة والشوكة، ويلمس المفارش ويبص على الحيطان وياخد باله من الإضاءة ويظهر إعجابه بالخلفية الهادية وريحة المكان الجميلة ونضافة فريق العمل وفهمهم للمينيو ولطلبات العميل وأدبهم في التعامل معاه وسرعتهم في التسليم.
ايه فايدة الاكل اللذيذ في مكان وحش وخدمة متأخرة وعامل مش فاهم نص كلامك وريحة مش حلوة واطباق اكل مش نضيفة؟!
3- عدم التخطيط
لما كافيه أو مطعم يبيع منتجاته باسعار غالية ممكن يكون بسبب المنافسة، فدا محتاج إنك تبيع آلاف الطلبات يوميا من منتجاتك عشان تحقق ربح مقبول.
والموضوع ده محتاج إنك تنظم خطوات العمل الداخلي وتصمم ديكور الكافيه بحيث إنك تقدر تبيع فعلا آلاف الطلبات بسهولة من غير ما تتعطل او تتأخر.
- لازم الطلب ياخد أقل حاجة ممكنة من وقت وجهد العامل عشان ياخد الطلب من العميل ويقدمه وياخد تمنه ويكرر ده كله تانى.
- لازم تمنع أي زحمة ممكنة في خط سير كل عامل في الكافية.
- لازم تخطط طريقة الطلب بحيث تحتاج أقل وقت وأقل مجهود ممكن. مينفعش تاخد وقت طويل عشان تعمل المينيو بتاع الكافيه، وكمان لما تيجى تنضف المكان وترتبه، متنساش قواعد السلامة.
4- الكافيات مبتبيعش قهوة بس
بيع القهوة بيحقق نسب ارباح عالية، لكن هتدفع المصاريف مقدما وعادة بيكون كل سنة– زى الإيجار، وكمان هتشترى كميات كبيرة من لوازم مشروبات القهوة المختلفة عشان توفر.
ممكن تلاقى كافيه زحمة جدا، لكن لو بصيت في دفاترة المحاسبية هتلاقيه بيغطى مصاريفه بالعافية.
وبيع القهوة بس لوحده مش هينفع، ولازم تركز إنك تبيع مكملات لشرب القهوة، زى المعجنات والمخبوزات وغيرها..
5- إنك تركز جدا ازاى تقلل الهدر
الجديد فى عالم صناعة الأغذية هيركز ان ميكونش عنده أي هدر، زى أكل متباعش.
اللى هيدخل فى المجال ده هيتصدم من كمية الاكل اللى بتترمى كل يوم، والموضوع ده ممكن يخليه يقلل كميات الاكل كل يوم، أو يسيب الاكل اللى بيتعمل كل يوم فترة طويلة عشان ميترميش.
المشكلة هنا أن صناعة الأغذية بتعتمد على انك تملى الرفوف بمنتجات كتيرة ومختلفة، وطازة، فلو الزبون شاف رفوف فاضية أو عليها وحدة أو اتنين، فمش هيقرر يشترى، أما لو اشترى فعلا واكتشف ان الاكل مش طازة أو قديم، فمش هيشترى منك تانى، وهيطلع يقول للعالم أن اكلك مش طازة.
6- التركيز اووى على الربح والمكسب
زى النقطة اللى فاتت، إنك تركز إنك تحقق اعلى ربح في بداية المشروع ممكن يدمر علاقتك مع الموردين اللى هتطلب
منهم أقل سعر ممكن، ويخلى كل تركيز الإدارة على السعر بدل ماتركز ازاى تبنى علاقة تجارية وشراكة مع الموردين وتضمن توريد البضاعة الكويسة في الوقت المناسب، وهتنشغل الإدارة انها تدور على أرخص سعر بدل ما تركز ازاى تبنى علاقة ثقة وإعجاب مع العميل عشان تحوله من عميل مرة واحدة لعميل مدى الحياة.
7- سوء اختيار العاملين
القهاوى والمطاعم مبتبيعش مشروبات وأكل، غلطان اللى شايف كده، هى بتبيع خدمات عشان تتخلص من القلق وتقضى وقت ممتع وتتواصل مع اصدقائك وتنتمي للمكان وغيرها كتير من المشاعر الإيجابية.
عشان تحقق ده لازم توفر موظفين يساعدوك تحقق الأهداف دى، زى انهم يفتكروا أسماء الزباين، ويبقوا عارفين طلباتهم اللى متعودين عليها، كل الحاجات الصغيرة دى بتبنى علاقة كويسة بين زبون الكافيه / المطعم.
أما الموظفين اللى مبيعملوش كل ده، فهيلاقوا الزبون نفسه مش مشدود للمكان، لأنه ملقاش اللى يساعده يبنى علاقة اجتماعية بينه وبين المكان، وعشان كدة سهل تنسى الأماكن الباردة اللى زى دى ومترجعلهاش تانى.
8- إنك تعمل حيرة بالعروض الكتير
في بداية مشاريعهم، بيكونوا متأثرين بكل اللى قرؤوه ودرسوه فى مقالات التسويق، وعشان كده بيحاولوا بسرعة يقدموا عروض كتيرة لزباينهم. في حالة الكافيه / المطعم، بيكون الزبون محتاج الاكل والشرب بسرعة، ومبيكونش عنده حالة ذهنية تساعده يعمل مقارنة بين كل عرض وبين اللى هو محتاجة دلوقتى.
ده غير إنك عشان توفر اختيارات كتيرة بيبقى ليها سعر عالى فى التكلفة وده بيقلل الجودة عشان تحافظ على هامش الربح. قلة الجودة هتسيب عند الزبون ذكرى مش كويسة، وده هيقلل المبيعات وهيخليك تخسر زباين.
9- مكان مش مناسب
من أكبر أسباب نجاح / فشل مشاريع الكافيهات والمطاعم هو الموقع والمكان، فى كافيهات فشلت لأنها مكانتش مناسبة لطبيعة المكان اللى حوليها، أو كانت في مكان مبيعديش عليه ناس كتير، أو صعب الوصول ليه، أو بيكون زحمة في يوم أو اتنين بس فى الأسبوع. عشان الكافيه ينجح، لازم يركز على جمهور ثابت، عدده كبير، بيجيله طول أيام الأسبوع، وبيعدى عليه ناس في الاجازات الأسبوعية.
10- سياسة تسعير فقيرة
الكافيهات بتعاني من تقلبات أسعار مكونات القهوة، ولو صاحب الكافيه شغال بسياسة تسعيرية فقيرة، فهتسيبله هامش ربح قليل، فلما أسعار القهوة تغلى هيخسر على طول، ولو زود سعره مش هيضمن أن الزباين تشتري منه بالسعر العالى.
مهم: 11 درس في الحياة والتجارة
فى الناحية التانية، لما الكافيه يقدم عرض خاص على مشروب الاسبريسو عشان يغرى الزباين، والاسبريسو مشهور أنه منتج مبيأثرش السعر عليه كتير لو كانت جودته عالية، ساعتها مش هتكون ردة الفعل ملموسة، وهيكون تقليل السعر تمنه سلبي. عشان كدة، إنك تحط أسعار المنتجات على اساس التكلفة مش على اساس توقعات السوق بيخسرك أرباح كتيرة.
لو كنت انتهيت، وأنت مقتنع اني بتكلم بس عن الكافيهات والمطاعم فأنت فاتك بيت القصيدة،
لو دققت في الكلام والنصايح، هتلاقيها سهلة إنك تطبقها على أي مجال شغل تدخل فيه.
خلاصة الملاحظات هي ركز على العميل، قدم له صنف واتنين وعشرة، ركز على التسويق وازاى تبنى علاقات كويسة مع الموردين، صمم ديكور محلك كويس وخلى دورات الشراء والبيع قصيرة وسهلة،
اختار موظفين عندهم خبرة كويسة، حاول تكسب اللى يكفيك عشان تكون راضى عن شغلك ده،
اختار موقع كويس للمحل، وهكذا، وكل دى نصايح ممكن تطبقها في تجارات تانية كتير.
