بوب لودك مستشار وخبير مبيعات تقاعد بعد 30 سنة قضاها في انه يدرب مندوبين المبيعات وينمى مهاراتهم، بوب حط 7 نصايح “افكار تسويقية” شايف ان ليهم أهمية كبيرة للشركات الصغيرة والمشاريع الناشئة.
كل نصيحة تسويقية منهم بتوفر طريقة سهلة بتكلفة قليلة لأي شركة صغيرة لسة بتبدأ وعايزة تسوق لمنتجاتها وخدماتها عشان تزود العملاء والمبيعات.
إقرأ المزيد: أسباب فشل معظم مشاريع الكافيهات
1. بلاش تسعى ورا سياسات إعلانية زى الشركات الكبيرة
الشركات الكبيرة بتسعى – عن طريق سياسات إعلانية ضخمة انها ترسخ اسمها التجاري في دماغ المستهلكين، وتخلق طلب على منتجاتها المستقبلية، وطبعا الشركة الصغيرة مش هتتحمل تلجأ لسياسات زى دى.
البديل:
صمم إعلاناتك بنفسك، الإعلانات دى لازم تركز على تنشيط المبيعات، عن طريق ضمان عرض خاص فيها، وضمان طريقة سهلة للمستهلكين عشان يستفيدوا –فعلاً- من العرض الخاص ده.
الإعلانات الجيدة تبيع المنتج اليوم ، وتبني العلامة التجارية ليوم غد.
Luis Bassat
2. وفّر نسخة أرخص
فى عملاء بيكونوا مش مستعدين يدفعوا السعر اللى بتطلبه مقابل السلعة أو الخدمة اللى بتقدمها، وفى عملاء تانية مهتمة اكتر انها تاخد سعر أرخص أكتر من اهتمامهم بجودة أعلى.
البديل:
ممكن تتفادي خسارة أي مبيعات متوقعة بانك توفر نسخة مُصغرة بمواصفات أقل من المنتج أو الخدمة بسعر أقل.
3. وفّر نسخة خاصة (استثنائية)
عكس النقطة اللى فاتت، مش كل العملاء بيدوروا عن الأرخص بس، لكن فى عملاء بتدور على النادر والمختلف عن غيره من المنتجات والخدمات مقابل انهم يدفعوا سعر أكبر.
البديل
ممكن تضاعف متوسط مبيعاتك عن طريق انك توفر نسخة مش عادية من منتجك/خدمتك، أو انك تدمج منتجات/خدمات كتير في باقة واحدة بسعر أعلى.
4. جرّب اغرب طُرق التسويق
دور دايماً علي طرق تسويقية متكونش تقليدية واللي غفل عنها المنافسين، ممكن تكتشف طرق مربحة تزود المبيعات وتتجنب المنافسة الشرسة.
كمثال: اطبع أفضل إعلان صغير ليك بحجم بطاقة البريد وابعتها لكل عملائك المحتملين في سوقك المحتمل.
اعلان زى ده ممكن يزود زوار موقعك، وده هيزود مبيعاتك مقابل تكلفة قليلة.
5. صغّر حجم إعلاناتك
قلل حجم إعلاناتك بطريقة تسمحلك تنشر عدد أكبر من الإعلانات، مقابل نفس التكلفة، هتتفاجئ لما تعرف أن عائد النسخة الصغيرة من الإعلان أفضل من عائد النسخة الكبيرة.
6. رتب عروضً تسويقية مع شركات صغيرة تانية
اتصل بشركات صغيرة تانية –مش منافسة ليك- واللي بتخدم نفس الشريحة من عملائك في السوق.
اعرض عليهم التسويق لمنتجاتهم / خدماتهم لعملائك مقابل أنهم يعملوا زيك مع عملائهم، العروض دى بتزود المبيعات مقابل تكلفة قليلة.
مهم: 11 درس من الحياة والتجارة
7. استفيد من عملائك
عملائك عارفينك كويس وواثقين فيك بسبب تعاملهم معاك، ودول سهل تاخد منهم شغل مقارنة باللى متعاملش معاك أبداً قبل كده، استفيد من الموضوع :
- اعمل عروض خاصة لعملائك الحاليين وتعلن عن منتجاتك/خدماتك الجديدة ليهم قبل غيرهم.
- حاول تحول عملائك لمسوقين ليك عن طريق انك تنفذ سياسة تحفيزية بانك هتكافئهم مقابل انهم يعرفوا معارفهم وأصدقائهم عن منتجاتك/خدماتك.
السياسة التسويقية دى أقل تكلفة من غيرها وهي بداية التسويق بالمديح.
نصيحة تسويقية كمان!
اعمل على موقعك صفحة عليها إجابات الأسئلة المتكررة الي بيكررها عملاءك، بكده هتوفر وقتك اللى هتقضيه في إجابة الأسئلة دى، وكمان العميل يعرف الإجابة اللى بيدور عليها.
الصفحة دى ممكن تجيبلك عملاء جديدة بيدوروا عن اجابة أسئلة زى دى!
