بمناسبة حركة الجنيه الأخيرة والكلام الدائم عن تحرير سعر الصرف، أنا كنت حابب اشرح:
- يعني ايه أصلًا تحرير سعر الصرف؟
- ازاي البنك المركزي بيثبت سعر العملة؟
- ايه اللي بيحدد سعر العملة لو البنك المركزي مش بيتدخل؟
أولًا لازم نعرف إن فيه سوق عملاق اسمه الـinterbank market، وده سوق لتداول العملات والمشتقات المالية بين البنوك وبعضها.
إقرأ المزيد: التسويق بالأسرار – أرجوك متقولش لحد
ليه بيحصل تداول للعملات بين البنوك أصلًا؟
لسببين:
- لو بنك محتاج يشتري دولار أو أي عملة غير عملة البلد اللي هو فيها ممكن يشتريها من سوق الـinterbank.
- البنوك بيبقى فيها مكاتب للمضاربة على العملات لصالح البنك. فالبنوك طول الوقت بتبيع وتشتري عملات مختلفة بهدف الربح.
طيب ازاي البنك المركزي بيثبت سعر العملة؟
خلينا ناخد مثال: بنك CIB محتاج يشتري مثلًا 10 مليون دولار. بيروح سوق الـinterbank يشوق مين من البنوك الثانية مستعد يبيع 10 مليون دولار، ويلاقي مثلًا QNB مستعد يبيع المبلغ ده بـ30 جنيه لكل دولار.
هنا البنك المركزي لو حابب يثبت سعر الدولار عند 27 جنيه بيتدخل في النص يشتري من QNB بـ30 جنيه ويبيع لـCIB بـ27 جنيه بس.
وفي الحالة دي يبقى البنك المركزي اتكلف حوالي مليون دولار عشان يثبت سعر الصرف.
البنك المركزي بيعمل ده طول اليوم وكل يوم على كل العملات عشان يقدر يتحكم في سعر الصرف عند مستويات معينة.
طيب البنك المركزي بيدبر التكاليف دي منين؟
من الاحتياطي النقدي! عشان كده في أوقات الأزمات اللي بتنخفض فيها قيمة العملة، الاحتياطي النقدي كمان بينخفض لإن تكلفة تثبيت سعر الصرف على البنك المركزي بترتفع مع الوقت.
عشان كده في الأوقات اللي زي دي البنك المركزي بيضطر يفرض قيود كبيرة على الحصول على العملات الأجنبية عشان يقلل الطلب عليها وبالتالي يقلل تكلفة تثبيت سعر الصرف.
لو البنك المركزي قرر يحرر سعر الصرف ويخرج من عمليات البيع والشراء بين البنوك، مين اللي هيحدد سعر العملة؟
العرض والطلب.
في المثال اللي قلناه فوق CIB عايز يشتري 10 مليون دولار هيكلم باقي البنوك ويشوف مين هيعرض عليه أقل سعر ويشتري منه.
فمثلًا QNB هيقوله أنا هابيع بـ30 جنيه، وHSBC يقوله أنا هابيع بـ29 والبنك الأهلي يقوله أنا هابيع بـ31، فيروح يشتري من HSBC.
عمليات البيع والشراء اللي بتحصل طول اليوم بين البنوك هي اللي بتحرك سعر الصرف كل يوم.
هل اللي حصل ده تحرير حقيقي لسعر الصرف؟
ده هيبان الأيام الجاية. محتاجين نشوف الآتي:
- تحرك سعر الصرف ارتفاعًا وهبوطًا بشكل ديناميكي على مدار اليوم، الحركة في مستويات معينة اللي شفناها خلال الأيام اللي فاتت هي أحد أعراض تدخل البنك المركزي والحركة اللي شفناها امبارح قد تكون حركة حقيقية، وقد يكون البنك المركزي تدخل مرة تانية عشان يسيطر على السوق.
- رفع القيود على العملات الأجنبية في البنوك. لو حركة سعر الصرف مفيهاش تكلفة على البنك المركزي، يبقى مفيش داعي للقيود الصارمة المفروضة حاليًا على التعامل في العملات الأجنبية،
رفع القيود دي تدريجيًا هيكون مؤشر على تنفيذ البنك المركزي لوعوده بتحرير سعر الصرف.
مهم: 11 درس من الحياة والتجارة
هل السعر الحالي هو القيمة الحقيقية للجنيه؟
صعب نجاوب على السؤال ده حاليًا.
اللي نقدر نسترشد بيه إلى حد ما هو سعر الدولار بناءًا على سعر الذهب (34.5 جنيه لكل دولار)، وسعر الدولار الحالي في السوق السوداء (33-34 جنيه لكل دولار).
فلو ده تحرير حقيقي لسعر الصرف، المستويات الجديدة اللي هتتحرك فيها الأسعار هتتحدد على مدار أسابيع مش يوم ولا اتنين.
