في الاول لازم اوضح حاجه بسيط جدا لازم حضرتك تكون فاهم كويس ان خطة المبيعات ملهاش علاقة بالخطة التسويقية لمشروعك دي حاجه ودي حاجه تانية خالص.
عشان في ناس كتير بتفتكر ان الاتنين واحد وفي الحقيقة خطة المبيعات انا بعتبرها خريطة بتكون من خطوات واهداف، بتنفذها عشان تحقق اعلي عائد ربح من المبيعات، اما الخطة التسويقية هي بتهتم بالجوانب التنافسية، وازاي تجذب العميل لمنتجاتك، وازاي تسوق للمنتجات بتاعتك في السوق وتنافس بيها.
تعامل مع حالات الرفض التي تتلقاها من زبائنك كطلبات منهم لمزيد من المعلومات.
Brian Tracy
ازاي تعمل خطة مبيعات مصغرة
زي ما قولتلك في تدوينة سابقة، ان خطة المبيعات عبارة عن خطوات واستراتيجيات عشان تحقق اهداف مبيعاتك، وعشان تعمل خطة مبيعات في خطوات لازم تمشي عليها.
إقرأ المزيد: افضل طريقة تعرف بيها مشروعك التاني
1. اختار استراتيجية تساعدك توصل لمبيعاتك
- بتحدد اهداف مبيعاتك سواء شهري او كل 3 شهور او كل 6 شهور او سنوياً.
- بتحدد لكل مندوب Target بتاعه اللي المفروض بيحققه.
- بتحدد الاستراتيحية اللي هتحقق الاهداف دي، زي انك تلمع المنتج بتاعك في عين العملاء، وتخلي المنتج بتاعك او الخدمة بتاعتك الناس بتكلم عنها بشكل كويس، وده هيساعدك تبيع بشكل كبير جدا.
2. تكتك لمبيعاتك
يعني حضرتك تقعد مع نفسك بكوباية شاي وتمخ مخ كويس زي الـCoach في الماتش وبعد ما تكون حددت اهدافك واستراتيجياتك لمبيعاتك، حدد التكتيك بتاعك.
علي سبيل المثال انت قولت ان الاستراتيحية بتاعتك عايز كل الناس تعرف المنتج او الخدمة بتاعتك، التكتيك بتاعك هو ايه الطريقة اللي هتعرف الناس بيها المنتج بتاعك، مثلا هتعمل اعلانات او هتنظم ايفنت والناس كله تحضر وهكذا..
زي ما تحديد الاهداف والاستراتيجية مهم، كمان التكتيك مهم.
3. خليك دايما في عقل كل عميل عندك
كل الناس اللي شغاله في المبيعات شغلها الشاغل هو ازاي اكون دايما الخيار الاول في تفكير العملاء، وانه دايما فاكرني وفاكر منتجاتي، لان ده في حد ذاته هيزود مبيعاتك ودعاية ليك بدون ماتحس، ازاي ده؟ تعالي نتخيل حالة وشوف ده هيزود مبيعاتك ولا لأ .
تخيل كده انت فاتح محل ملابس وفي عميل بيشتري منك وشايف ان منتجاتك كويسة وسعرك كويس جدا وجالك واحد صاحبه عايز يشتري لبس مثلا، هيقوله انا اعرف مكان كويس جدا وسعره حلو، وبكدا انت مش محتاج تعمل دعاية لنفسك ونظرية البيع بتقول ايه الزبون بيجيب زبون، فخليك دايما في عقل الناس، ابعت كل شهر رسالة للعملاء بتوعك بتفكرهم بيك “تكتيك”.
4. دور ازاي تزود مبيعاتك مع العملاء بتوعك
خليك دايما بتفكر ازاي تزود المبيعات بتاعك؟ اهتم بالعملاء الموجودين معاك دلوقتي، دول اللي هيعملوا ليك قاعدة عملاء جدد، وخليك دايما فاكر قاعده كويس جدا “الزبون بيجيب زبون” فمع كل منتج او خدمة بتقدمها للعميل، حاول دايما تسيب انطباع كويس عنده عشان يجيلك تاني وتالت وطبعا ده هيزود مبيعاتك كويس جدا.
مهم: 11 درس من الحياة والتجارة
5. اختصر في خطة مبيعاتك “خطة مبيعات مصغرة”
يعني كل ما كانت الخطة مختصرة وواضحة كل ما كان مراجعتها ومتابعتها هيكون بشكل اسرع واسهل ومنتظم،
يعني علي سبيل المثال انت حددت خطة لمبيعاتك في 3 عناوين مثلاً:
- هعمل استراتيجية ازاي احافظ علي العملاء اللي عندي.
- تكتيك للحفاظ على العملاء اللي عندي.
- استراتيحية عمل قاعدة عملاء جديدة.
اذا كل ما كانت خطة مبيعاتك مصغرة كل ما كانت اسهل، لو اتبعت الخطوات اللي قولنا عليها هتقدر تعمل خطة مبيعات بنفسك وبدون الاستعانة بأي حد.
