الحلول الستة البديلة للاقتراض البنكي

تفتكر ان في حلول فعلا بديلة للاقتراض البنكي!

طبعا اي حاجة في الدنيا ليها حل بس احنا دايما بندور علي اسهل حل او اول حل يجي في دماغنا، وحاليا احنا عايشين في وضع اقتصادي صعب علي مستوي العالم كله بسبب التضخم وإرتفاع الاسعار، وفي ناس كتير الفترة اللي فاتت بدأت تروح لفكرة الاقتراض البنكي، عشان تصرف علي حاجات إستهلاكية، ودي كارثة في حد ذاتها، لانك بتحمل نفسك اعباء جديدة انت مش قدها، بسبب ارتفاع سعر الفائدة علي الاقتراض البنكي.

ومع كل التغيرات اللي بتحصل علي مستوي العالم، فالاقتراض البنكي مش افضل خيار تروحله، ونصيحة ليك من صاحب بيزنس دور علي حلول بديله غير الاقتراض، وحاول توفر الفلوس اللي انت محتاجها من مصادر تانية اقل تكلفة، خاصتاً اذا كنت هتستخدم الفلوس دي في شراء حاجات إستهلاكية.
ولو  جت في دماغك فكرة الاقتراض من البنك عشان احتياجات إستهلاكية، حاول تأجل القرار ده لمدة اسبوعين وهتلاقي نفسك بترجع في قرار انك تأخد قرض من البنك اساساً.

إقرأ المزيد: دليل لعمل دراسة جدوي كاملة لمشروعك

الحلول الستة البديلة للاقتراض البنكي

1. حاول اي فلوس تكون باقية من استهلاكاتك إركنها علي جنب علي طول بدون تفكير، علشان لو احتجت فلوس بدل ما تفكر تاخد قرض من البنك.
2. متصرفش فلوسك في اي حاجة انت مش محتاجها في الوقت الحالي، وقلل من صرف فلوسك علي السلع الاستهلاكية، واصرف بس علي الحاجات الاساسية اللي محتاجها، ووفر الباقي لسداد إلتزاماتك واستثمارتك.
3. لو انت هتاخد قرض من البنك عشان تصرفه علي حاجات استهلاكية زي شراء سلع ترفيهية! يبقي بلاش منه خالص وحاول تشيل فلوس علي جنب واعمل بيها الحاجة اللي انت عايزها.  
4. دور علي مصادر تانية اقل تكلفة تعرف توفر فلوس منها بدون فوائد، يعني مثلا اعمل انت وصحابك جمعية وهنا هتمسك مبلغ كامل علي بعضه تقدر تعمل بيه اللي انت عايزه بدون اللجوء للاقتراض من البنك.
5. خليك تقيل لو انت عايز تتعامل مع البنك استغل فرصه ان البنك يعمل نظام تقسيط علي البطاقات الائتمانية بدون فوائد لمدة سنة واستغل العرض في حالة لو محتاجه ضروري.
6. لو انت عايز تشتري شقة بالتقسيط دور علي افضل عروض التقسيط سواء مع البنك او الشركات العقارية، وطبعا احنا دلوقتي عندنا ميزة التمويل العقاري من الدولة بفائدة 3% وكمان الدولة بتعمل مشاريع سكانية ممكن تشوف الافضل ليك والاقل تكلفة وتستغله.

ازاي تحمي نفسك من الاقتراض البنكي

لما تعرف المشاكل اللي ممكن تقع فيها بسبب الاقتراض او بتشوف غيرك من اللي اخدو قرض من البنك
والمشاكل اللي بيقع فيها بسبب التأخير في سداد قسط القرض والغرامات اللي بتيجي عليه وبتوصل انه بيكون بلاك لست وبتوصل كمان للمحاكم!
هتفكر الف مرة قبل ما تاخد قرض من البنك، وكمان الاقتراض بكل الطرق بيأثر علي الإلتزاماتك الشخصية فضروري تفكر كويس قبل ما تاخد خطوة في الاقتراض البنكي.

مهم: 11 درس من الحياة والتجارة

وحاول توفر فلوس علي جنب وتدخرها وتستثمرها هيكون حل افضل ليك من الاقتراض من البنك، لان ده هيوفرلك فلوس وقت ما تحتاجها، وحاول تشيل من مرتبك حوالي 15% وكل ما زادت النسبة دي كل ما كان كويس ليك.