في البداية هنتكلم عن ادارة الافراد في المنطقة العربية، في بعض المديرين العرب اللي بيتعاملوا مع الموظفين كعبيد، اهم حاجه عنده هو البيع والتارجت وشغله يخلص وخلاص، من غير اي اهتمام بظروف اي عامل أو موظف، كلامنا هنا على الغالبية مش بالاجماع، اكيد فيه مديرين بيهتموا بفكرة الجانب الانساني في إدارة الأفراد حتى لو قليلين، الموظف العربي محتاج معامله انسانية زي اي موظف في الدول الكبيرة.
للفوز في السوق، يجب عليك أولاً الفوز في مكان العمل.
دوغ كونانت
اي هو الجانب الانساني في إدارة الأفراد ؟
هنتكلم دلوقتي عن حل المشاكل اللي بتواجه الشركات وازاي يكون فيه جانب انساني في ادارة الافراد، وهنبدأ كلامنا عن كيم سكوط وهي خبيرة ادارة الافراد، عملت شركات خاصة نجحت وفشلت، واشتغلت مستشارة ادارية لشركات كبيرة زي جوجل وتويتر وابل.
قصة كيم سكوط مع ادارة الافراد
سنة 2000 كانت كيم بتملك شركة تطوير تطبيقات، كان لازم في اليوم ده انها تختار سعر بيع مناسب لمنتج في شركتها، بس وهي خارجه من الباب قابلت زمايلها في الشغل، كلهم عاوزين يتكلموا معها، واحد بيتكلم عن صحته والتاني عن ظروف ابنه في المدرسة، والتالت بيشتكي من زوجته، وعلشان هي المديره، سمعتهم كلهم كويس، وعاملتهم بطيبة وجبر خاطر، بس مش وصلت للسعر الكويس لبيع المنتج.
كيم بتأكد هنا على حاجة مهمه وهي انك لو وصلت وبقيت مدير، ده مش هيوقفك انك تساعد وتسمع لزمايلك ومتكونش متكبر عليهم، بالذات الاهتمام بيهم ممكن يقلل وقتك في الشغل وميكونش في وقت كافي للتجارة والشغل.
أساس ادارة الافراد هي العلاقات الانسانية
لازم المدير يكون عنده انسانية وطيبة، ودي صفات ممكن تتعلمها، بالاخص لما يكون معاك حديث تخرج، شباب لسه بيبدأ حياته العملية، انت ممكن تكبرهم وتديهم خبراتك ويكونوا محترفين، الادارة الكويسة معناها انك تدخل في علاقات انسانية كبيرة، وده التحدي اللي بيكون المدير فيه لما الشركة تكبر وينشغل بالفلوس وممكن ينسى البشر.
لازم صاحب الشركة يتكلم مع المديرين بتوعه، علشان يتكلموا مع الموظفين، علشان يتعرف عليهم كويس ويشوف اهدافهم وحياتهم، ويشوف طموحهم في المهنة، وايه الحاجه اللي بتحفزهم وتخليهم يحسوا بحيوية ونشاط، وايه هي الحاجات اللي بيهتموا بيها.
نصائح كيم سكوط لادارة الافراد
- كيم بتنصح المديرين انهم يعملوا اجتماع فردي مع كل فرد في الشركة، مره كل 3 شهور، وتطلب من كل واحد رأيه في الشغل، ورأيه في المدير، وايه الصح اللي بيعملوا والغلط، وايه اللي لازم يعملوا علشان يكون كويس في شغله، ولازم يكون فيه أمان علشان يتكلموا من قلبهم، متخلهمش يحسوا بالراحة علشان مش ينافقوك وتسمع كلام تحبه ويرضي غرورك.
- كيم بتشوف ان لازم الموظف يعرف انطباعك ورأيك فيه من غير تجميل، ولازم المدير ميتحكمش في مشاعرهم، كمان لازم المدير يكون صريح وواضح.
- كيم بتحذر في المديح الغلط للموظف، علشان بيجيب حاجات عكسي، لازم تعرف ازاي تمدح الموظف، ولازم يكون قدام كل الناس، ولازم يكون فيه مصداقية، ولو معملتش كل ده هتلاقي فيه حاجات عكسية للمديح ده، الناس كلها بتعرف الكداب والمنافق والجاهل بسرعة.
المدير الفاشل هو اللي بيتجاهل
كيم بتحذر المديرين اللي ممكن كتير يعملوه، يعني يدخلوا اجتماعات مع الموظفين، ويقولوا انهم هيعملوا ايه الفتره الجايه، ويرد الموظفين ويقولوا انهم اتكلموا قبل كدا ورفضوا الفكرة، ده بيعتبر استخفاف برأي الموظفين، ومفيش اي اهتمام لكلامهم.
في موقف زي ده لازم يكون فيه حوار، ويكون فيه حجه بحجه، وتوضح كلام الادارة والغرض منها.
مساهمة الافراد في اتخاذ القرار
كيم اتعاملت مع شركات طبقت كلامها اللي فات، ورد الفعل كان ان كل الموظفين عاوزين يحضروا الاجتماعات دي، وانهم يشاركوا في اتخاذ القرارات، وده صعب التنفيذ، كيم بتنصح انه لازم اتخاذ اي قرار مصيري يكون بالطريقة دي، وباقي القرارات الصغيرة، سيبها لباقي المديرين في الشركة، ولازم يكون في اجتماعات تانيه، وتشوف نتيجة اجتماعات المديرين مع الموظفين، وايه اللي وصلوله وايه اللي اتفقوا عليه.
إقرأ المزيد: دليل عمل دراسة جدوي كاملة لمشروعك
القرارات المهمة لازم الكل يشارك فيها
الحاجه المهمة هنا، لازم اي قرار مهم للشركة يكون بين اعضاء الفريق كلهم، ويبعدوا المديرين عن القرارت دي، علشان مش ينفذوا اي قرار بسبب حبهم للمدير او كرههم له شخصيا، فيه موظفين لو استبعدتهم في انهم ياخدوا اي قرار مصيري ممكن يتعمدوا فشلك، وممكن يحسوا انهم مكروهين ودي طبيعة البشر.
لما الموضوع بيتحول لشخصي، هتلاقي العقل بيرفض الحقائق، ويركز على الحاجات التافهه الصغيرة، علشان كدا لازم يكون كل فريق العمل مشارك في القرارات، ودي ليها مميزات كتير وعيوب بردو.
التهاون في اتخاذ القرارات المصيرية
مشكله تانيه ممكن تلاقيها في اي شركة، هي ان يكون في سرعة في اتخاذ اي القرار، وممكن ناس جايين الاجتماع صدفة وياخدوه القرارات دي، ومش من ناس عندهم العلم وفاهمين كويس، لازم تمنع الكلام ده لو حصل.
متخليش الاجتماعات حاجة روتينية وبتضيع الوقت على الفاضي، متدخلش اي اجتماع ممكن تعرف نتايجه بالرسايل الالكترونية بدل الاجتماع.
سيب حرية الكلام للموظف واسمعه كويس، ولو محصلش يبقى ملوش لازمة الاجتماع، ديما اسأل الموظف ايه اللي كنت عاوز تعمله بدل من شغلك دلوقتي؟
ميزة اي مدير ناجح انه مبيطلبش تقارير كتير
اي مدير بيحتاج تقارير علشان يقيس الاداء من كل اللي موجودين، علشان يعرف ازاي الشركة ماشيه، بس لو الموضوع زاد، بينقلب ضده، فيه مهندس بيصمم العربية على الورق، وفيه صانع بيصنع القطع الصغيرة، وفيه ميكانيكي بيخلي القطع دي تشتغل مع بعض، كل واحد بيدير بطريقته، وبردو الحرية هي اللي بتخليهم يبدعوا، لازم المدير يفهم طلباتهم، ولازم يشجعهم كلهم ويقدرهم بالتساوي.
لو منجحتش معاه، اخلص منه
في النهاية، لازم تعرف انك لازم تتخلص من اي عنصر في فريقك مش بيتقي الله في شغله أو بيعمل احباط لروح الفريق، بس ده معناه بردو ان المدير فشل في فهم نفسية الموظف وانه ينصحه ويرشدوا للطريق الصح، بس ممكن أوقات تبقي تعمل كدا.
إقرأ المزيد: 11 درس من الحياة والتجارة – نصائح للفريلانسر
