ممكن تكون سمعت من قبل عن كسب المال وانت نايم، الكلام دا صح نسبيًا، ودا اللي بيجذب الناس انها تعتمد على الدخل السلبي passive income عشان تعمل أرباح مستمرة مقابل مجهود قليل وغير مستمر. لكن ايه هي مشاريع الدخل السلبي؟
مفتاح الحرية المالية والثروة الكبيرة هو قدرة الشخص أو مهارته على تحويل الدخل المكتسب إلى دخل سلبي.
Robert Kiyosaki
ايه هو الدخل السلبي؟
مشاريع الدخل السلبي هي مشاريع بتستثمر فيها وقتك ومجهودك وفلوسك بدون اي عائد في الوقت الحالي، يعني مش منتظر منها اي ارباح في الاول، بس انت عارف ان هيجي وقت عليك وتحقق اعلي ارباح من المشاريع دي.
طبعا ناس كتير ما بتحبش مشاريع الدخل السلبي لانها مبيكونش عندها الصبر الكافي تنتظر ارباحها ، للأسف هما عايزين يفتحو الصبح المشروع ويستلمو الارباح اخر اليوم!
إقرأ المزيد: التسويق بالأسرار – أرجوك متقولش لحد
عشان كده اللي بيستثمر وقته او فلوسه في مشاريع الدخل السلبي بيكون ليه عقلية مختلفة في كل حاجة حتي ادارته لمشروعه وكل ما كنت مختلفة ومميز في السوق كل ما حققت ارباح كبيرة.
4 افكار لمشاريع الدخل السلبي
1. مشروع بيع الكتب الالكترونية
في الوقت الحالي اغلب الناس مش عندها الوقت الكافي عشان تتعلم حاجة جديدة كل يوم سواء انها تروح اماكن تتعلم فيها او انها تنزل تشتري كتب تقراها عشان تتعلم حاجة جديدة،
فلو انت عندك مهارة الكتابة وخبرة في حاجة معينة ممكن تعمل كتاب الكتروني وتبيع وتكسب منه فلوس.
2. مشروع عمل موقع تعليمي
المشروع ده مربح جدا لان في ناس كتير جدا بتدور علي موقع الالكتروني تتعلم منه مهارة او تقنية جديدة وكمان في ناس مبيكونش عندها وقت تروح اماكن تاخد دورات تدربية في حاجة معينة،
فلو انت عندك خبرة في مجال معين صمم دورة تدربية مدفوعة الاجر عن طريق الانترنت صدقني هتلاقي اقبل علي الموضوع ده كبير جدا.
3. استثمر فلوس في البورصة
طبعا ناس هتسمع كلمة بورصة هتقولك انا خسرت فلوسي وده مشروع فاشل وناس كتير بتتعب نفسياً فيه وبتخسر كل فلوسها فيه، بس انا مقولتش ان الاستثمار في البورصة حاجة سهلة وان انت هتحقق منه ربح كبير علي طول عشان في ناس بتنخدع وهي داخله في المجال!
الاستثمار في البورصة مش مجرد هتشتري اسهم وبعد فترة هتبيعها وهتكسب منها! الموضوع مش بالسهولة دي، محتاج تكون فاهم آلية عمل البورصة وفاهم مصطلحاته وتتعلم تحليل اساسي وتحليل فني وادارة مخاطر.
4. عمل موقع عروض وتخفيضات
كل الناس دلوقتي بتدور علي العروض والتخفيضات في كل مكان سواء علي السويشال ميديا او علي المواقع الالكترونية عشان تشتري احتياجاتها.
ممكن تعمل موقع بيجمع كل التخفيضات والعروض اللي بتنزل في كل المجالات او مجال معين وتكسب من خلال اعلانات ادسنس وعمولة من اكواد الخصم.
نصيحة اخيرة: الاستثمار في مشاريع الدخل السلبي دايما محتاجة صبر وعقلية مختلفة للاستثمار، لان في ناس بتزهق ومبتقدرش تكمل وبتحكم علي نفسها بالفشل وانها استثمرت فلوسها في المكان الغلط! لازم تفكر كويس قبل ما تدخل في مجال ارباحه بتحقق بعد فترة طويلة مش قليلة.
