معظم الناس لما الدنيا تبقي مش كويسة معاهم من ناحية الفلوس بيرمو الحجج علي الظروف والغلاء اللي احنا فيه، وبيحاول يهرب من المسؤليات اللي عليه، بس خلي بالك ان ده مش هينفعك بحاجة لو فضلت واقف تتفرج وما اخدتش خطوة لقدام.
لازم تتحمل مسؤلياتك كلها سواء الشخصية او المالية، وتكون مستعد لأي ظرف طارئ، بحيث لو لا قدر الله حصل ازمة مالية تقدر تتجاوز الازمة وتقلل اضرارها قدر الأماكن وتتعلم ازاي تتعامل مع ازماتك المالية كويس اوي عشان متقعش في مشاكل كتير وتحمي نفسك.
هناك درس أساسي حول الأزمات المالية أن الحكومات تميل إلى الانتظار طويلاً، والتقليل من المخاطر، وتريد فعل القليل! وفي النهاية يبتعدون عنهم ، وينتهي بهم الأمر بإنفاق المزيد من الأموال، مما يتسبب في المزيد من الضرر للاقتصاد.
تيموثي جيثنر
طبعا كلنا معرضيين اننا ممكن نمر بأزمات مالية في فترة او فترات في حياتنا واوضاع احنا مش حابين نكون فيها، وبالرغم ان المشاكل المالية تحديدا مش سهلة، بس احنا لازم دايما نكون مستعدين ليها ونكون قدها وندور علي حلول لحل المشاكل المالية دي.
ومينفعش توقف تتفرج من بعيد ويكون عندك احساس ان الموضوع كبير عليك خاصتا لو متابع جيد لصاحب بيزنس، لازم تتحرك وتبدأ تفهم اسباب الازمة المالية دي حصلت ليه؟ و تدور علي حلول! لأن دي الخطوة الأولى عشان تبدأ تتعامل معاها، و خليك حاطت في دماغك انك في النهاية هتتخلص منها وتنتقل لمرحلة جديدة تصنع فيها المجد المالي وتحقق احلامك واهدفك.
إقرأ المزيد: أسباب فشل معظم مشاريع الكافيهات
هنا في صاحب بيزنس هنقدملك اهم الاسباب اللي ممكن بسببها تقع في أزمة مالية، و مش هنكتفي بس بالاسباب كمان، هنحاول نعرضلك معاها بعض الحلول عشان تقدر تتخطي وتعدي اى أزمة مالية تواجهك.
هل انت دخلك قليل؟
طبعا الدخل القليل مش السبب الوحيد اللي بيوصل لأزمات مالية، اكيد فيه اسباب تانية كتير، بس هو مؤشر بيوضح ان فيه حاجة لازم تاخد بالك منها وتعدل فيها،
يعني زي ما كلنا عارفين ان الوضع الطبيعي هو ان دخل الفرد لازم يتضاعف علي الاقل كل تلات او خمس سنين، و دي حاجه اي حد ممكن يعملها لو كان عنده فعلا الهدف ده من جواه وانه مستعد يشتغل بذكاء عشان يوصله، وانه يبدأ يتعلم العلوم والمهارات المطلوبة اللي تساعده يزود دخله عشان يحقق هدفه، لان في الوقت الحالي لازم تتعلم حاجات كتير وتثقف نفسك ويكون عندك رصيد من المعلومات والخبرات، وده كله طبعا عشان تقدر تواجه مشكله دخلك القليل.
وعشان تقدر تتجاوز مشكلة دخلك القليل لازم تتعلم 3 حاجات:
- مهارات زيادة الدخل.
- الإخار.
- الإستثمار.
وده طبعا لو كنت عايز ترتقي بمستواك المادي والهدف ده نابع من جواك، لازم يكون عندك المعرفة الكافية عن الـ3 حاجات اللي قولنا عليهم لان ده هيوصلك لتحسين وزيادة دخلك المالي.
وعشان تزود دخلك ممكن تفكر لو كنت مش مرتاح في وظيفتك وحاسس انك ممكن تلاقي احسن و اعلي منها في المرتب، فابدأ دور علي وظيفة احسن مش بس راتبها يكون اعلي كمان تضيف لخبراتك، وبشكل عام هتقدر تزود دخلك
لو استخدمت مواردك الشخصية من معرفة ومهارات بذكاء واحترافية.
خلي بالك من الإسراف في الإنفاق
ناس كتير من الافراد او الاسر اللي دخلهم متوسط دايما بيعانو من مشاكل مالية مزمنة، و هنا انخفاض دخلهم مش هو السبب! هنلاقي ان قلة الوعي و التدبير المالي وترشيد الاستهلاك، وانهم مبيعرفوش يوفرو فلوس ويفهمو اولوياتهم الحياتية كويس، وللاسف ناس كتير من الطبقة دي معندهمش ثقافة بكل ده، وانهم يستثمرو فلوسهم او يدخروها، هما بيصرفو كل الفلوس اللي بيكسبوها وخلاص، و مش بس كدا ده اوقات كتير بترتفع مصاريفهم فوق مستوي الدخل بتاعهم! وده طبعا اكبر غلط في مفهوم النمو المالي الشخصي، لانك لو عايز توصل للاستقرار المالي وتزوده انسي ان ده يحصل لو فضلت ماشي بالسياسة دي لانها مفيهاش ادني تحمل.
الحل الوحيد انك تغير من اسلوب نظامك وتعدل فيه وساعتها هتتحسن حالتك المادية و هتوصل لنتايج كويسة ومنها هتعرف تحقق كل احلامك، وفي نفس الوقت هتضمن لنفسك حياه كريمة ومستقلة ماليا في المستقبل، ولازم بكل الطرق تفكر هتعمل كدا ازاي؟
مثلا تحاول توفر من مرتبك 10% وحاول تستثمر النسبة في المجال اللي انت هتعرف تمشي فيه كويس وتدرسه قبل اي حاجه، جرب الطرق دي وحاول تتعود عليها وباذن الله هتنجح علي المستوي الشخصي والمالي.
لو وقعت في فخ الديون
فخ الديون سببه الاساسى هو ان معظم الشباب بيكون عندها قلة وعي من ناحية تدبير الفلوس، وانهم مش بيكونو عندهم الثقافة المالية الكافية وبيبدأ حياته ومبيفكرش في كل ده، و ياخد الخطوة الاولي من غير تفكير ووعي منه او اهداف واولويات مالية محددة ومن غير ما يحط النقط علي الحروف! ويلاقي نفسه بعد كدا واقع في فخ الديون والازمات المالية.
و هنلاقي ان عدم الثقافة و قلة الخبرة والتعليم مشكلة في حد ذاتها ومنتشرة بشكل خطير جدا في مجتمعنا، وهي في الواقع مشكلة عالمية، والحل هنا بيبدأ بالخبرة والوعي بالامور المالية خصوصا للشباب، وطبعا لازم يكون للاباء دور مهم جدا في انهم يهتمو بتعليم اولادهم الثقافة المالية من صغرهم.
وبلا شك زيادة الدخل مع تقليل مصاريفك هو افضل حل عشان تعدي الضغوطات المالية وتتخلص من ديونك، فلو كنت واحد من اللي بيعانو من الديون لازم تفكر في زيادة دخلك و تعبتره حل اكيد ومضمون وتفكر تستثمر او تشتغل في اي وظيفة اضافية.
خليك واعي بمسؤلياتك المالية
معظم الناس هي اللي بتدخل نفسها في دوامة الديون وطبعا هي مبتكونش واعيه و ده بيوصلهم لأزمات مالية شديدة وفي نفس الوقت الازمات دي انت ممكن كنت تتجنبها الاول بطريقة سهلة وبسيطة لو كنت عندك وعي وحاسس بمسؤلية ناحية فلوسك، ودلوقتي هنعرضلك امثلة بتترتب علي الديون اللي بتقع عليك:
زي المستحقات المالية اللي لازم تدفعها وهي الفواتير وشيكات الدفع و غيرها من الحاجات اللي بتفضل تأجلها لحد ما تدخل في دوامة الديون والضغوطات والمشاكل اللي ملهاش اخر اللي بتسببلك الحزن واليأس، وبتقف قدام احلامك واهدافك! ليه تدخل في كل ده من الاول؟ جرب تظبط مصاريفك و تعرف اولوياتك و احتياجاتك ووفر فلوس علي جمب وفكر في الاستثمار عشان تزود فلوسك وفكر في بيزنس تعمله بس تكون دارسه كويس.
مهم: 11 درس من الحياة والتجارة
و لازم تعرف حاجه مهمة انك لو مريت بأزمة مالية مينفعش تخليها تتراكم، حاول تحلها وتعالج الاسباب اللي وصلتك للأزمة، وتدور علي حل ليها عشان تعديها.
دي الخطوات اللي هتخليك تعرف تتعامل مع أزماتك المالية، و مش عيب انك تستشير حد يفكر معاك ويكون عنده خبرة مالية، يمكن عنده حل احسن، و في الاخر انت هتقارن كل الحلول و تشوف ايه الانسب ليك وتنفذه، المهم ان تواجه مشكلتك المالية و تحلها ومش تقف تتفرج عليها، عشان في النهاية تقدر توصل للحرية المالية اللي بتحلم بيها.
