الامريكي العصامي جيمس ألتشر اشتغل موظف ثابت، بعد كدا ساب الشغل عشان يعمل شركته الخاصه، اتعلم شوية دروس من تجربته ونشرها في مقال للناس، جيمس عمل شركته في بداية ظهور الانترنت وانتشاره، كان الناس وقتها بتدور علي اللي يصمم مواقع ليها على النت، وجيمس كان بيعرف يصمم المواقع دي، وبعد ما ده بقي شغله الخاص، لخصّ أهم الدروس اللي اتعلمها من شغله في الـ 11 درس اللي هنتكلم عنهم النهاردة.
1- لو الامور مبقتش كويسه، هيكون ده بسببك في الاول
لما تعمل شركة خاصة وتشتغل فيها طول اليوم، انت في الاول والاخر قبطان المركب، ولازم تتحمل كل المسؤلية على اي حاجه تحصل، ولو معندكش خبرة القيادة والادارة، وكنت سايبها لغيرك، اكيد هتخسر كل حاجه في القريب، المسؤولية بتبدأ لما تعترف بغلطك وتشتغل بسرعة عشان تصححه، ومتلومش حد غيرك.
2- لازم يكون في تواصل مع الناس
قليل من مؤسسي شركات النت بيختاروا المجال ده في الشغل عشان بيخجلوا من التعامل مع الناس الغريبة، المشكلة هنا لو انت بعدت عن عملائك، هما اللي هيسيبوك ببساطة، وده نفس الكلام على الموظفين اللي معاك، لو مش شافوك، هتخسر احترامهم ليك، ولو اختفيت عن المساهمين في شركتك هيقاضوك، ارفع راسك فوق وواجه الناس واتكلم معاهم وناقشهم.
3- لازم الموظفين يكونوا راضيين عن شغلهم معاك
جيمس كان مضطر عشان يحسس العملاء بتوعه بالرضا بالشغل معاهم، وان حياتهم هتكون سهله بسبب وجوده وتقديم خدماته ليهم.
استخدم جيمس نظام المكافأه لكل اللي معاه سواء موظف أو عميل، وكان فرض عليه انه يحسس كل اللي حواليه بالرضا والراحة، وكان اول حاجه عملها انه يحسن من نفسه وطريقته في التعامل.
4- أي فكرة هتكون مناسبة
في بداية شركته جيمس كان عاوز يكسب فلوس، كان بيدخل في اكتر من نشاط للشركة، شركته في الاصل كانت متخصصة لتصميم مواقع النت، بس هو كان مضطر انه يشتغل في الاعلانات والاغاني والتطبيقات وغيرها، رغبته في انه يكسب فلوس كانت مهمه، عشان كدا شركته دخلت في كذا نشاط.
طبعا الكلام ده مش القاعدة اللي الناس بتمشي عليها، عشان مفيش احسن من انك تتخصص، بس ممكن تتنازل في مرحلة معينه عشان شركتك تفضل عايشة.
5- خلى بالك من السرقة
جيمس اتسرق قبل كدا من موظفينه وعملائه ومن اصدقائه وشركائه، ومرتين من شخص ماشي دخل المكتب وسرق حاجات كتير، بس الموظفين فهموا للشخص ده وبدأوا يطاردوه.
6- لازم تعلم غيرك
احترامك لازم تثبته لما تقرر انك تعلم الموظفين والعملاء بتوعك، ده لازم يكون ليك معرفة بالعلوم، عشان كده انت لازم تتعلم وتقرأ وتشوف الجديد، لما تعلّم غيرك ده بيكون بناء لنفسك وشخصيتك والثقة اللي هتكون بينكم.
7- لازم تتعلم حاجه اول ما ينتهي شغلك
اي علم بقى موجود وممكن تتعلمه بسهولة، ممكن خلال الساعه واليوم والاسبوع وعمرك كله، عشان كدا لما تخلص شغل، لازم يكون في وقت عشان تتعلم كل جديد عشان تقدر تحافظ على مكانتك وتزودها بين اي منافس، ولازم يكون ليك أصدقاء عندهم الخبرة عشان تستفيد منهم في اي جديد.
اليوم اللي هتقف ومتتعلمش فيه اي حاجه جديدة، ده اليوم اللي هتّوه فيه ومش هتلاقي اي علامات ترشدك للمكان اللي عاوز تروحه.
مهم: 11 درس من الحياة والتجارة
8- لازم تسامح نفسك
لما تكون ليك الكلمة الاخيرة في شركتك، ولو عملت مجهود جبار، هتكون نص قراراتك غلط، وعشان تحول المشاكل لفوائد، لازم تسامح نفسك وتقبل الغلط وانك مش كبير عليه، المسامحة دي بتشيل من عليك اي اعباء، وبتديك فرصة عشان تحول المصايب لفوائد.
9- لازم تاخد القرارات الصعبة
مكنشي لجيمس اي مدير عشان يشتكي ليه، وكان طرد 2 من الموظفين اللي شغالين معاه، وبردو طرد عملاء ليه، وكان بياخد قرارات الناس وقتها كانت شايفه انها قرارات غلط ومدمرة ليهم، القرارات الصعبة بتدربك لحد ما تعرف تاخدها في الوقت الصح والمكان الصح.
10- لازم يكون ليك عملاء وموظفين مقربين ومحترفين
لما تدور على موظفين عشان يشتغلوا معاك في فريق العمل، لازم تدور على المحترفين بينهم عشان يكونوا في شركتك، وممكن تلاقيهم عن طريق اعلانات النت، ولما تدور على عملاء كويسين، لازم تعمل نفس الكلام ولما تحتاج لشريك في الشغل بيقدم خدمات معينة، لازم تعمل بردو نفس الكلام.
هتروح للمكان اللي بيروحوه سواء مؤتمرات أو معارض أو اجتماعات أو غيرها، عشان تتعرف عليهم وتضمهم للفريق، وممكن تقابلهم صدفة في حياتك العادية، وفي الوقت ده لازم تتعرف عليهم وتشرحلهم انت محتاج ايه وفوائد الشغل معاك ايه، وتسيب وسيلة اتصال بينكم، مره مع مره هتتعلم وتبقى كويس، انك تتعرف على الناس الغريبة حاجه كويسة جدا.
11- امتى أقدر أبيع شركتي
لما جيمس شاف ان علوم تصميم المواقع بقت بتدرس في المدارس وبقت منتشرة، فهم انه لما يصمم موقع من 4 صفحات بمبلغ 80 الف دولار مش هيدوم لفترة طويلة، ولما جتله الفرصة بدأ يعرض شركتة للبيع، وباعها بسعر كويس.
بعد كدا اللي توقعه حصل، وبقى ارخص حاجه هي تصميم مواقع النت.
جيمس بيقول ان احسن حاجه في فكرة بيع شركتك هي الحرية اللي هتاخدها، وبعد كدا تبدأ تعمل شركة جديدة.
الكلام ده بيفكرنا بموقع ديليشيوس، اللي قرر صاحبة انه يبيعه وهو في صدارة المواقع، بعد كدا مبقاش له قيمة وده كان توقعه، بسبب وجود برامج التصفح، بقت خدمات الموقع ده ملهاش أي قيمة.
في مواقف هيكون البيع هو الافضل والمربح في الوقت ده ليك، افتكر ديما ان لعيب الكورة بيعتزل وهو في احسن حالاته، عشان الناس تفتكره على حالته الكويسة دي.
إقرأ المزيد: 10 نصايح ألبرت ويلسون للشركات الناشئة والصغيرة
