هنتعرف النهاردة على الكاتب العصامي لاري التون، واللي نشر مقالة في مجلة انتربرنور، كان عنوانها 10 خطوات عشان تكون عصامي ناجح، بيتكلم عن قصص لاشخاص عصاميين ناجحين وايه هي النقاط المشتركة بينهم.
عشان كده خصصنا ليكم المقال ده واللي هيضم الملخص المهم اللي محتاجه اي واحد عاوز يكون عصامي ويبدأها من الصفر.
مهم: أهم 11 درس لما تبدأ شغلك الخاص
عشان تكون عصامي ناجح حب الحاجه اللي بتعملها
الحب وحدة مش كفايه انت لازم تكون عاشق لشغلك، الحب ده هيخليك تكمل حتى لو واجهتك مشاكل كتير ومصايب، العشق هيخليك تدور على كل جديد ونادر، ممكن يكون منتج او خدمة، حب يكون ملوش شريك، خلي مشروعك هو كل حاجه في عقلك وقلبك، وتركيزك كله واهتمامك ده لو نص عقلك او قلبك ملهمش مكان في طريق النجاح.
بمعني أصح لما تبدأ تعمل مشروع هتلاقي صعوبات كتير، مفيش حاجه هتفيدك غير اخلاصك وحبك لمشروعك عشان تحل المشاكل اللي هتواجهك.
خطوة بتجيب خطوة
اكيد هتلاقي قصص نجاح لعصامي غامر بكل حاجه ونجح في وقت قصير، بس ده الاستثناء مش القاعدة اللي لازم تمشي عليها، المشكله ان لما تقرأ اي قصة نجاح، انت بتقرأ الملخص بس، اختصار سنين، ممكن يكون نسي خطوات مهمه كانت فارقه معاه.
أي تقدم ولو صغير ليك هو نجاح، درجة طلعتها على السلم ولازم تكون سعيد بيها وتحتفل بيها.
اتعلم من الناس
اي قصة لعصامي هتلاقي مواقف ليهم وهما شباب، يعني اشتغلوا مع ناس اتعلموا منهم كتير وده أثر على حياتهم وتفكيرهم، اي حاجه متعرفهاش بتتعلمها بتجربة او غلطه، أو من ناس عندهم الخبرة واللي عدى عليهم نفس المواقف، احنا البشر بنتعلم من اخطاء غيرنا، ولما احنا نغلط بننصح غيرنا،
اكيد مش هتلاقي كل الناس بتحب تنصح، فيه اللي بيكتم المعلومة، وهتلاقي اللي بيحبس العلم، بس اكيد هتقابل اللي بيحب ينشر العلم وينصح الناس بخبرته، وده اللي لازم تعمله انك تدور على ناس تتعلم منهم وتستفيد من خبرتهم، وبعد كدا هتبقى انت اللي بتعلم الناس.
لازم تعرف ازاي تسوق لشغلك ولنفسك
دي خطوة مهمة، لازم تبدأ تعرفها وتطبقها من وانت صغير، عشان لما تكبر يكون عندك خبرة فيها، الناس بتحب اللي واثق من نفسه، مش اللي يكون متردد، فريق العمل هيشتغل بإبداع لما يعرف ان وراه مدير واثق من نفسه، ليه رؤية وخطط، يكون واضح في اهدافه.
لازم مؤسس الشركة يكون كل تركيزه على البيع، وعلى اي حاجه تخليك تزود المبيعات، ويتشجع الموظفين على انهم يكونوا زيه، ولازم الاهتمام بالعميل، التسويق مش بره الشركة بس، انت لازم تشجع موظفينك عشان يقتنعوا برؤيتك واهداف الشركة وازاي تتصرف في المشاكل.
خلي عندك المبادرة وابعد عن السلبيه
اي عصامي ناجح بيغير اي عُرف موجود ويكون في جديد وبيحركوا المياة الراكدة، مفيش تكاسل في اي شركة لسه جديدة، اي شركة جديدة معندهاش اجازات نهاية اسبوع او انك تاخد اجازة في اي وقت، لازم الشركة تقف على رجليها وتحقق اهدافها ويكون فيه موظفين كويسين يقدروا يتصرفوا في اي وقت.
لازم صاحب الشركة يكون شغال فيها لحد ما تكون قوية، اي عصامي معندوش اي موارد عشان يعرف كل كبيرة وصغيرة في الشركة، ولازم يثق في شعوره الداخلي، حتى لو غلط في توقعاته، مره تانيه هيجيب الهدف، وده فيه مكاسب كبيرة للعصامي وشركته.
لازم تكون صاحب الخطة
كلنا عارفين ان لو مفيش تخطيط لاي حاجه هو تخطيط هيوصلك للفشل، ازي تخطط لتأسيس الشركة؟
لازم تقرأ عن نجاح غيرك ومشاريع غيرك بالذات في المجال اللي ناوي تشتغل فيه، دور على برامج في التلفزيون او النت هتلاقي قصص لعصاميين في مجالك.
مش شرط تكون خطة العمل لاي مشروع مجلد كبير، الاهم انها تكون موجوده في الواقع، متخليش حاجه للصدفه، تغطي كل حاجه في الشركة.
لازم تكون مشهور
الشهرة هنا مش زي شهرة الفنان او لعيب الكورة، خليك مشهور في مجالك، يعني اي حد في مجال شغلك يكون عارفك ويستفيد منك.
براندي بينيت مؤسس سابق لموقع هوست جيتور، بيقول ان في الوقت ده ممكن تعمل مدونة وتكتب عليها بانتظام، وتتطوع بوقتك وخبرتك عشان تثبت انك خبير في مجال شغلك وعشان الناس تثق فيك.
ابدا دلوقتي.. الوقت مش متأخر
اتكلمنا قبل كدا عن قصص نجاح لناس صغار في السن وكبار بردو، عشان نعرفك ان الوقت اللي تقرر فيه انك تكون عصامي هو مش متاخر، متكونش متردد وخش عالم العصامية، ومعانا دليل على عصامي حاول لحد ما نجح وهو في سن 65 سنه وهو مؤسس سلسة مطاعم كنتاكي المشهورة في العالم.
خلي معاك فريق احلام
في اي قص نجاح، هتلاقي العصامي بيعتمد على شريك او مساعد ليه، وده بيساعده كتير في انه يوصل لاهدافه ونجاحه، حتى لو ملقتش شخص موهوب تعتمد عليه، هتلاقي المؤسس بيعين كوادر واعدة ويبتدي يدربها بنفسه، عشان تكون الجيل اللي هيشيل الشركة بعد كدا، ويوفر الوقت للمؤسس عشان يحط الخطط.
فيه عصاميين اسسوا اكتر من شركة ناجحه، وتلاقيهم بيعتمدوا في كل مره على ناس معينين عشان يساعدوهم على نجاح الشركة، وده بيكون مقابل اسهم وحصص وشراكة، فالعصامي الصح هو اللي يدي الموظف حقه قبل ما يجف عرقه.
إقرأ المزيد: الجانب الانساني في إدارة الأفراد
خلي بالك من اسلوبك
انت زي المرايه اللي بيشوفها كل شخص في فريق العمل في مشروعك الجديد، يعني لو بترفض النصائح وتعنف اللي بيعدل على شغلك، هتلاقي اللي شغالين معاك زي القطيع بيقولوا حاضر ونعم وبس.
لو بقيت كسول هتلاقيهم زيك، زي مانت هتكون هتلاقي موظفينك زيك.
اكيد لما يكون ليك شغلك الخاص الجديد لازم اعصابك تبقى حديد، ولازم تسهر وتشتغل لوقت كبير، ولازم يكون فيه راحه عشان تعرف تكمل، بس في الوقت ده لازم توضح للموظفين انت عملت دي ليه وعشان ايه، ممكن يكون فيه سوء ظن لانه سهل، بس حسن الظن بيحتاج قوة وجهد.
في نهاية المقال احب اقولك
اكيد فكرة انك تبدأ شركة جديدة، له تمن كبير على حياتك الشخصية والعائلية وعلى صحتك، عشان كدا لازم يكون فيه توازن بينهم، ولازم تتوقف عن القلق والتوتر وتريح عضلاتك وعقلك وتوسع صدرك وترتاح، تعلم من اخطائك، كل انسان اتعلم كدا في مرحلة الطفوله الزحف والمشي والجري وهكذا.
المقال ده كنز للناس اللي عاوزه ملخص سريع عن عصاميين ناجحين، جمعنا قصص كتير ولخصناها بشكل سهل وبسيط، وكتب كتيرة كانت محور النقاط العشرة دي.
تعرف علي: ازاي تكون صاحب بيزنس ناجح
